Бул тууралуу EurasiaPluse маалымат агенттиги билдирди.
Turmush — Кечээ, 16-майда Өзгөн районунун Дөң-Булак айыл өкмөтүндө той-аштардагы ыксыз чыгымдарды кыскартуу боюнча жыйын болуп өттү. Бул тууралуу аталган айыл өкмөттүн башчысы Дүйшөнбек Батаев билдирди.
Маалым болгондой, жыйынга айыл тургундары, айыл аксакалдары, имамдар катышты.
«Президенттин жарлыгынын негизинде той-аштардагы, маркумду узатууда ысырапкерчиликке, ыксыз чыгымга жол бербөө боюнча жыйын өткөрдүк. Жыйында ысырапкерчиликти токтотуу боюнча жер-жерлерде түшүндүрүү иштерин жүргүзүү, ыксыз чыгымдарды кыскартуу боюнча тынымсыз иш алып баруу талкууланды», – деди Батаев.
————————————————————
Президент Садыр Жапаров 2024-жылдын 15-октябрында «Маркумду узатуу жана сөөгүн жайга коюу иши жөнүндө» мыйзамды ишке ашыруу боюнча жарлыкка кол койду. Эми Кыргызстанда мүрзөдөгү эстеликтер жана тосмолор жыгач материалдардан даярдалат жана бийиктиги 0,70 метрден ашпайт.
Президенттин жарлыгында маркумдарды жайга коюу салттарын жана каадаларын тартипке келтирүү, мүрзөгө эстеликтерди коюуда ысырапкорчулукту болтурбоо үчүн муфтият фатваларды чыгарары белгиленген. Аталган мыйзамдын 22-беренесине ылайык, тарыхый-маданий мааниге ээ болгон көрүстөндөрдү кошпогондо, мусулман кабырларынын аймагында таштан, граниттен, мрамордон, металлдан жана ушул материалдарды айкалыштыруу менен жасалган монументтерди, статуяларды, эстеликтерди жана мүрзө плиталарын тургузууга жана орнотууга тыюу салынды.
Кыргызстан мусулмандарынын дин башкармалыгында жумушчу топ түзүлүп, фатваларды иштеп чыгып, калк арасында түшүндүрүү иштерин жүргүзөт. Муфтият мүрзө таштары үчүн маркумдун аты-жөнүн, туулган жана өлгөн жылын көрсөтүү жетиштүү экенин белгиледи.
2022–жылдын 24-февралында президент Садыр Жапаров «Кыргыз Республикасында үй-бүлөлүк салтанаттарды жана маркумду эскерүү үрп-адаттарын тартипке келтирүү боюнча чаралар жөнүндө» жарлыкка кол койгон.
Жарлыктын максаты — Кыргыз Республикасынын жарандарынын социалдык жана экономикалык жашоо деңгээлин жогорулатуу, ошондой эле диний ырым-жырымдарды, үрп-адаттарды жана коомдун руханий абалына терс таасирин тийгизүүчү башка иш-чараларды өткөрүүдө ысырапкорчулукту болтурбоо.
Сүрөт: akipress.org сайтынан алынды