Бул тууралуу EurasiaPluse маалымат агенттиги билдирди.
АКИpress – «Манас» эл аралык аэропорту 2025-жылдын 9-августунан тарта өзүнүн үч тамгалуу IATA кодун — учурдагы FRU кодун жаңы BSZ кодуна расмий түрдө өзгөртөт. Бул тууралуу 19-майда Жарандык авиация мамлекеттик агенттиги маалымдады.
Агенттик жаңы коддун тамгаларынын келип чыгышын түшүндүрдү. Агенттиктен такташкандай, аэропорттор үчүн коддорду Эл аралык аба транспорту ассоциациясы (IATA) өзү берет.
IATA′нын тандоосунун башкы принциби — уникалдуулук, «бир код — бир жер». Код аэропорттун, шаардын же темир жол станциясынын учурдагы кодун кайталабашы керек.
Экинчи принцип — коддун эстеп калууга оңой болуусу. Башкача айтканда, код шаардын же аэропорттун аталышын чагылдырышы керек. Эгерде «жакшы» комбинация ээленип калса, анда эреже боюнча бош варианттардын арасынан мүмкүн болушунча жакшысы тандалат.
Жаңы коддо, B — «Bishkek» Бишкек шаарынын аталышынын биринчи тамгасы; S — «Bishkek′теги» Sh транслитерациясын чагылдырат. Z — коддун уникалдуулугун камсыз кылган нейтралдуу үчүнчү позиция.
Маселенин тарыхы
2024-жылдын июнь айында Жарандык авиация мамлекеттик агенттиги «Манас» эл аралык аэропортунун IATA кодун өзгөртүү пландары жөнүндө билдирген. FRU үч тамгалуу идентификатору аэропортко борбордун мурдагы аталышы — Фрунзенин урматына берилген.
Ошол учурда ЖАМАнын башчысы Данияр Бостонов процедурага ылайык, агенттик «Манас» аэропортуна учуп келген бардык авиакомпаниялардын кодду өзгөртүүгө макулдугун алганын билдирген. Кыргызстандын атынан Эл аралык аба транспорту ассоциациясына (IATA) арыз жөнөтүлгөн.
Бирок IATA′нын 2025-жылдын 9-майындагы расмий билдирүүсүндө 7 авиакомпания кодду өзгөртүүгө макул, ал эми 4 каршы добуш бергени айтылат.
Сүрөт: akipress.org сайтынан алынды