Бұл туралы EurasiaPluse ақпарат агенттігі хабарлады.
Иран Google-ға қарсы сотқа шағымданбақ: Парсы шығанағының атауын қорғау
Иранның Виртуалды кеңістік ұлттық орталығы Google компаниясын «Парсы шығанағының» тарихи атауын бұрмалағаны үшін сотқа бермек. Орталық өкілдерінің айтуынша, Google карталарында және басқа қызметтерінде «Парсы шығанағы» атауын өзгерту – Иранның мәдени және ұлттық болмысына нұқсан келтіреді.
Құқықтық және парламенттік мәселелер орталығы басшысының орынбасары Мохаммад-Садек Фарахани бұл әрекетті айыптап, бұрмалау Иранның тарихи мұрасына қауіп төндіретінін айтты. Ол орталықтың үш бағытта шара қабылдайтынын жеткізді: халықаралық ұйымдарға ресми наразылық жіберу, халықаралық соттарға шағымдану және Иранның өз ішінде тиісті органдар арқылы сот процестерін бастау.
Фарахани «Парсы шығанағы» атауы Иран үшін тек географиялық атау емес, ұлттық нақышы бар, мыңжылдық тарихы бар мәдени құндылық екенін ерекше атап өтті.
Google жағы бұл оқиғаға байланысты әлі ресми жауап берген жоқ.
Бұған дейін ирандық парламент мүшелері де Парсы шығанағының атауын өзгертуге деген кез келген әрекетке қарсы пікір білдіріп, бұл су айдыны Иран үшін тарихи әрі геосаяси маңызы зор екенін еске салған еді. Сондай-ақ, Иран халықаралық платформаларда Парсы шығанағының атауы бұрмалануына үнемі наразылық білдіріп келеді.
7 мамырда Иран Сыртқы істер министрі Аббас Аракчи Парсы шығанағы атауын өзгерту — бұл бүкіл ирандықтардың ұлттық қадір-қасиетін қорлау деп мәлімдеді.
— Бұл география мәселесі ғана емес, иран халқының ұлттық болмысын қорлайтын әрекет, — деді Аракчи X әлеуметтік желісінде.
Министр Парсы шығанағының тарихи атауы ғасырлар бойы халықаралық құжаттарда сақталғанын және әлем карталарында шынайы танылғанын атап өтті. Бұл пікір АҚШ президенті Дональд Трамп Эр-Риядқа барған сапарында «Парсы шығанағы» атауының орнына «Араб шығанағы» атауын қолдануға байланысты болжамды мәлімдемеден кейін айтылды.
Кілтсөздер: Парсы шығанағы, Иран, Google, тарихи атау, мәдени мұра, халықаралық дау, ұлттық бірегейлік.
Фото: inform.kz сайтынан алынды