Бул тууралуу EurasiaPluse маалымат агенттиги билдирди.
Turmush — УКМК тарабынан кармалган Ош шаарынын казысы Мирланбек Токтомушев үй камагына чыгарылды. Бул тууралуу Ош облустук сотунан билдиришти.
Маалыматка караганда, шаардык соттун 23-майындагы токтомунун негизинде УКМКнын тергөөчүсүнүн өтүнүчү канааттандыруусуз калтырылган.
Кылмыш-жаза кодексинин 209-беренесинин 2-бөлүлүгүнүн 1-пункту жана 4-бөлүгүнүн 4-пункту (кызматтык абалын пайдалануу менен олуттуу өлчөмдө жасалган алдамчылык) менен айыпталган Т.М.Б.га карата бөгөт коюу чарасы катары үй камагы түрү 1 айлык мөөнөткө, тактап айтканда 2025-жылдын 18-июнуна чейин колдонулган.
Сот айыпталуучуга бөгөт коюу чарасын тандоодо ага карата тергөө органы тарабынан коюлган кылмыш оор кылмыштардын түркөмүнө кирерин, бирок айыпталуучунун туруктуу жашаган дареги, жашы жете элек 1 баласы бар экендигин, мурда соттолбогонун, ден соолугу начардыгын, жакын арада эле стационардык дарыланууда жатып дарыланып чыккандыгын, жактоочу тарабынан анын камакта кармоого тоскоол болгон оорулар менен ооругандыгы жөнүндө тактама келтирилгенин эске алган.
Окуя тууралуу:
23-майда УКМК Ош шаарында алдамчылыкка шектелген адамдар кармалганын кабарлаган.
- Буга чейин «Turmush» редакциясы Ош шаарынын казысы Токтомушов Мирланбек Бакишович УКМКга жеткирилгенин жазган
.
Тергөөнүн маалыматы боюнча, Ош казыятынын кызматкерлери мечиттердин жана медреселердин кызматкерлеринен системалуу түрдө мыйзамсыз акча жыйнашкан. УКМК билдиргендей, бул аракеттер казыяттын айрым өкүлдөрүнүн жеке кызыкчылыктары үчүн жасалган.
Буга байланыштуу мечиттердин жана медреселердин кызматкерлери УКМКнын Ош шаары жана Ош облусундагы башкы башкармалыгына арыз менен кайрылышкан. Бул факт Кылмыш-жаза кодексинин 209-беренеси (алдамчылык) боюнча катталган.
Т.М.Б., М.Ж.М., Д.Б.Х. жана С.А.К. аттуу жарандардын үйлөрүндө жана жумуш орундарында тинтүү жүргүзүлүп, анын жүрүшүндө мыйзамсыз жыйымдардын фактылары аныкталган.
Жыйынтыгында Т.М.Б. жана М.Ж.М. кармалып, УКМКнын Ош шаары жана Ош облусундагы башкы башкармалыгынын убактылуу кармоочу жайына киргизилген. Тергөө амалдары жүрүп жатат.
Сүрөт: akipress.org сайтынан алынды