Telegram Ресейден кетеді деген жалған ақпараттар желіде тарады. Павел Дуров мән-жайды түсіндірді.
Соңғы күндері Telegram-арналарда мессенджердің Ресейден кететіні туралы ақпарат тарады. Бұл жаңалық бастапқыда сатирикалық басылымда әзіл ретінде жарияланған болатын. Алайда, біраз уақыт өткен соң, оны беделді арналар да таратып, әзіл екені туралы ескерту бермеді, деп жазды Telegram негізін қалаушы Павел Дуров.
Дуров: «Telegram ешқайда кетіп жатқан жоқ»
Павел Дуров өз жазбасында бұл ақпараттың жалған екенін айтып, кейбір арналарға тіпті ресми терістеу белгісін қосуға мәжбүр болғанын жеткізді.
Сонымен қатар, кей пабликтер Telegram арнасында фактчекинг функциясы іске қосылды деген ақпарат таратты. Алайда Factcheck.kz порталы бұл функция 2024 жылдың мамырында пайда болғанын, бірақ жұмыс істемегенін еске салады.
«“Код Дурова” мысал ретінде келтірген сатирикалық жарияланымға жазылған фактчек ескертпесінде нақты тексеруші ұйым көрсетілмеген. Сондықтан бұл басқа немесе өңделген функция болуы мүмкін», – делінген Factcheck.kz-тің мақаласында.
БАҚ-тағы басқа да жалған ақпараттар
Павел Дуров басқа да фейктерге тоқталды. Мысалы:
«Бұған дейін кейбір БАҚ Telegram-да OSINT арналары саяси себептермен бұғатталды деп жазды. Шын мәнінде, бірнеше арна жеке мәліметтерді жариялағаны үшін автоматты түрде қысқа уақытқа тоқтатылды. Олар дереу қайта ашылған, бірақ бұл туралы кейін шыққан жаңалықтарда айтылмады», – деді Дуров.
Telegram IP-адрестері жайлы — тағы бір техникалық фейк
Telegram IP-адрестері туралы тараған ақпараттарды Дуров «техникалық жағынан сауатсыз» деп атады. Желіде бұл IP-адрестер пайдаланушыларға қауіп төндіреді деген мазмұндағы мақалалар жарияланған.
«Мұндай жарияланымдарды тәуелсіз мамандар бірнеше рет теріске шығарды. Бірақ терістеу мақалалар бастапқы фейк ақпарат секілді кең таралмады», – деп жазды Павел Дуров.
Telegram – 12 жылдан бері еркін ақпарат пен құпиялықты қорғайтын платформа
Павел Дуровтың айтуынша, Telegram 12 жылдан бері жеке өмір құқығы мен ақпаратқа еркін қолжетімділікті қорғап келеді, сондықтан платформа жиі ақпараттық шабуылдарға ұшырайды.
«Telegram-ға қарсы бағытталған мақсатты дискредитациялық науқан болуы мүмкін. Сол себепті пайдаланушылар фейк жаңалықтардан сақ болуға тиіс», – деп кеңес берді ол.
Telegram-ға қатысты тараған «мессенджер Ресейден кетеді» деген ақпарат – жалған. Бұл мысал әзіл мен фейк ақпараттың айырмасын білу, сенімді дереккөздерге жүгіну қажеттігін тағы бір еске салды.