Фото: Яндекс
Атырау облысының Жылыой ауданында «Теңізшевройл» ЖШС экологиялық талаптарды өрескел бұзып, атмосфераға 49,3 тонна ластаушы затты заңсыз шығарған. Бұл көрсеткіш 2023 жылдың ортасынан бастап 2024 жылдың ортасына дейінгі төрт тоқсан ішінде тіркелген.
Арнайы экологиялық прокуратураның мәліметінше, осы көлемнің 5 тоннасы мүлде ешқандай рұқсат құжаттарынсыз ауаға тасталған. Қадағалаушы орган атмосфералық ауаның жай-күйіне талдау жүргізіп, заңбұзушылықтарды анықтаған.
Аталған деректер негізінде компанияға қатысты әкімшілік іс қозғалды. Сот «Теңізшевройл» компаниясын экологиялық заңнаманы бұзғаны үшін кінәлі деп танып, 639 миллион 600 мың теңге көлемінде айыппұл салу туралы шешім шығарды.
Қазіргі таңда сот шешімі заңды күшіне енді.