Бұл туралы EurasiaPluse ақпарат агенттігі хабарлады.
Қазақстанның еңбек сіңірген сәулетшісі, танымал мүсінші және Мемлекеттік сыйлықтың лауреаты Шота (Шот-Аман) Ыдырысұлы Уәлиханов 1932 жылы Солтүстік Қазақстан облысындағы Сырымбет ауылында дүниеге келді. Ол қазақтың ұлы ғалымы Шоқан Уәлихановтың ұрпағы. Шота Уәлиханов 1956 жылы Мәскеу сәулет-құрылыс институтын сәулетші мамандығы бойынша тәмамдады.
Еңбек жолын 1956-1959 жылдар аралығында Алматыдағы «Казгорстройпроект» мемлекеттік жобалау институтында сәулетші болып бастады. 1959-1965 жылдар арасында КСРО құрылыс және архитектура академиясының Қазақ бөлімшесінде аспирантурада оқыды, сонымен қатар Қазақ қалалық құрылыс жобалау институтында жұмыс істеді.
1965-1966 жылдары Алматыдағы Совет ауданында сәулетші қызметін атқарды, ал 1966-1967 жылдары Алматы қаласының бас сәулетшісінің орынбасары болды. 1967-1971 жылдары «КазпромстройНИИпроект» институтында аға ғылыми қызметкер лауазымын иеленді.
1971-1978 жылдары Мәдениет және тарихи ескерткіштерді қорғау қоғамы орталық кеңесінің төрағасының бірінші орынбасары, 1973-1982 жылдары Қазақстан Сәулетшілер одағында басқарма төрағасы, КСРО Сәулетшілер одағының хатшысы болды. 1982-1990 жылдары «Казграждансельстрой» бас сәулетшісі, директордың орынбасары қызметтерін атқарды.
1990-1993 жылдары Қазақстан Ғылым Академиясының әдебиет және өнер институтының бөлім меңгерушісі, ал 1993 жылдан бері Қазақ тарихи және мәдени ескерткіштерді қорғау қоғамының президенті болды. 1996 жылдан бастап, Абылай хан атындағы халықаралық қордың президенті қызметін атқарды.
Шота Уәлиханов Қазақстан Сәулетшілер одағын басқару кезінде жас сәулетшілердің дамуына зор үлес қосып, мүше санын бес адамнан 300-ден артыққа жеткізді. Ол «Динамо» стадионы, «Универсам» дүкені, Ш. Уәлиханов, А. Жангелдин, Ғ. Мұратбаев ескерткіштерінің авторы және Қазақстан Республикасының Мемлекеттік елтаңбасы мен Тәуелсіздік монументінің жобасына қатысқан. 1995 жылы «Құрмет» ордені мен «Белсенді қызметі үшін» төсбелгісімен марапатталды.
Сәбит Мұқановтың туғанына 125 жыл толуына орай жазған материалымызды да назарларыңызға ұсынамыз.
Фото: inform.kz сайтынан алынды