Бу ҳақда EurasiaPluse ахборот агентлиги хабар берди.
Тошкент шаҳри Ички ишлар бош бошқармаси сўнгги кунларда пойтахт кўчаларида хизмат вазифасини олиб бораётган ЙПХ ходимлари иштирокида юз берган йўл-транспорт ҳодисалари тўғрисида маълумот берди.
Қайд этилишича, шундай ҳолатларнинг бирида 23 апрель куни соат 08:30 атрофида Дўрмон йўли ва Мирзо Улуғбек кўчалари кесишмасидаги чорраҳада хизмат олиб бораётган ЙПХ инспектори — сержант Анвар Тоштемировни Tracker уриб кетган.
Шифохонага олиб борилган инспекторга ўнг ва чап қўл кўплаб шилинмалари, чап чаноқ суягининг бир неча жойдан синиши, чап тизза соҳаси ва оёқ юмшоқ тўқималарининг лат ейиши ташхиси қўйилган.
«Тирбандликнинг олдини олиш мақсадида чорраҳага чиқиб, унинг марказида ўзимга қулай жойни танладим. Учинчи қатордан келдими ёки тўртинчи қатордан, билмайман, Tracker келиб урди. Ўша ердаги ҳамкасбларим, Миллий гвардия, ҳаммаси келиб, биринчи тиббий ёрдамни кўрсатди», — деди инспектор.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Шунингдек, Нукус кўчасида Malibu 2 ҳайдовчиси давлат рақами белгиларисиз, барча ойналари қорайтирилган ва қўшимча жиҳозлар ўрнатиб ҳаракатланган.
ЙПХ ходими унга тўхташ ишорасини кўрсатган, аммо у инспекторнинг қонуний талабига бўйсунмасдан, ходимни машина капотида тахминан 1,5 километрга судраб кетган. Кўрилган чора-тадбирлар натижасида ҳайдовчи тўхтатилган.
Ҳолат юзасидан Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, ҳайдовчига нисбатан қамоққа олиш тарзидаги эҳтиёт чораси танланган. Машина жарима майдонига жойлаштирилган.
Фото: gazeta.uz сайтидан олинди