Бул тууралуу EurasiaPluse маалымат агенттиги билдирди.
АКИpress – 1941-1945-жылдардагы Улуу Ата Мекендик согуштагы Жеңиштин 80 жылдыгын майрамдоонун алкагында Бишкек шаарында ар кандай иш-чаралар өтөт.
Бишкек мэриясы иш-чаралардын программасын жарыялады:
8-майда саат 10:00дөн 12:00гө чейин «Ала-Тоо» аянтында аскердик парад өтөт. Парадга Куралдуу күчтөрдүн аскер кызматкерлери жана өлкөнүн башка күч түзүмдөрүнүн өкүлдөрү катышат. Парадда 120дан ашык аскердик жана атайын техника көрсөтүлөт. Иш-чарага Кыргызстандын жана Россиянын Куралдуу күчтөрүнүн авиациясы катышат.
8-майда Фрунзе көчөсүнүн Шопоков көчөсүнөн Ибраимов көчөсүнө чейинки бөлүгүндө саат 16:00дөн баштап аскердик техникалардын көргөзмөсү уюштурулат.
9-майда саат 10:00дө «Жеңиш» аянтында Түбөлүк отко гүлчамбар коюу менен митинг-реквием болот. Ошондой эле саат 14:00гө чейин жоокердик ботко берилип, майрамдык концерт уюштурулат.
9-майда саат 09:00дө Д.Асанов атындагы сейил бактан Жукеев-Пудовкин/Ибраимов көчөлөрү аркылуу «Жеңиш» аянтындагы «Түбөлүк от» мемориалына чейин «Өлбөс полк» аскердик-патриоттук жөө жүрүш башталат.
9-майда саат 17:00дөн 22:00гө чейин «Ала-Тоо» аянтында кыргыз эстрада жылдыздарынын жана россиялык артисттердин катышуусунда «Жеңиш ырлары» аттуу майрамдык концерт өтөт. Концертке кроссиялык артисттер: Radio Tapok, Amirchik, Тима Акимов, Татьяна Куртукова жана Дима Билан катышат. Концерттин аягында дрондордун шоусу күтүлөт.
Саат 12:00дөн баштап «Ала-Тоо» аянтында кыргыз жана орус элдеринин эрдигине арналган интерактивдүү аянтчалар иштейт.
Өткөрүлө турган иш-чараларга байланыштуу 8-9-майда төмөнкү көчөлөр убактылуу жабылат:
– Ибраимов көчөсү Жибек Жолунан Чүй проспектисине чейин;
– Шопоков көчөсү Жибек Жолу проспектисинен Чүй проспектисине чейин;
– Чүй проспектиси Курманжан даткадан Турусбековго чейин.
Сүрөт: akipress.org сайтынан алынды