Бұл туралы EurasiaPluse ақпарат агенттігі хабарлады.
Швецияда ұлттық қауіпсіздік кеңесшісі бірнеше сағаттан соң отставкаға кетті
Швецияда жаңа ұлттық қауіпсіздік кеңесшісі болып тағайындалған Тобиас Тюберг небәрі бірнеше сағаттан кейін қызметінен өз еркімен бас тартты. Бұл туралы AZƏRTAC агенттігі хабарлады. Оның мұндай шешім қабылдауына бұқаралық ақпарат құралдарында Grindr танысу платформасында жарияланған интимдік фотоларына қатысты сұрақтар себеп болған. Тюберг қауіпсіздік тексерісі кезінде бұл аккаунты туралы хабарламағанын мойындап, лауазымды атқарудан бастартқан.
Бұл жағдайға байланысты премьер-министр Ульф Кристерссон оқиғаны өте күрделі деп бағалап, тексеріс кезінде маңызды мәліметтерді жасырмау керектігін баса айтты. Үкімет басшысы осындай биік лауазымдарға кандидаттарды мұқият тексеру қажеттігін жеткізді.
Айта кетейік, бұл — биыл ұлттық қауіпсіздік жөніндегі кеңесші орнынан кеткен екінші жағдай. Бұған дейін қаңтар айында кеңесші Хенрик Ландерхольм құпия ақпаратпен жұмыс істеудегі қателіктерге байланысты тергеу жұмыстары басталған соң отставкаға кеткен болатын.
Оппозиция бұл жағдайды қатты сынға алды. Әсіресе, социал-демократиялық партия өкілі Петер Хультквист пен Жасылдар партиясы Швеция үкіметінің репутациясына нұқсан келді деп мәлімдеді. Олар қауіпсіздік пен ұлттық мүддені қорғаудағы мұндай қателіктер Швецияға халықаралық деңгейде сенімсіздік тудыратынын атап өтті. Солшыл партия жетекшісі Нуши Дадгостар да премьер-министр Ульф Кристерссонның таңдауда жауапсыздық танытқанын сынға алды.
Еске сала кетейік, Тюберг — тәуекелі жоғары аймақтарда қызмет атқарған тәжірибелі дипломат. Ол 2017–2019 жылдары Ауғанстанда, кейін Украинада Швеция елшісі болды және соңғы уақытта Швеция СІМ-нің Шығыс Еуропа және Орталық Азия бөлімін басқарды.
Кілтсөздер: Швеция жаңалықтары, ұлттық қауіпсіздік, Тобиас Тюберг, отставка, үкіметтің беделі, қауіпсіздік мәселелері, оппозиция сыны
Фото: inform.kz сайтынан алынды