Бұл туралы EurasiaPluse ақпарат агенттігі хабарлады.
Рим Папасы Лев XIV жексенбілік алғашқы уағызында әлемдегі бейбітшілік тақырыбын басты назарға алды. Ол Екінші дүниежүзілік соғыстың аяқталғанына 80 жыл толғанын еске салып, соғыста қаза тапқан 60 миллион адамның тағдырын ерге алды. Папа Лев XIV қазіргі кезде «үзік-үзік үшінші дүниежүзілік соғыс» жағдайында тұрғанымызды айтып, жаһандық көшбасшыларды бейбітшілік орнатуға шақырды.
Жаңа понтифик Украинада әділ және тұрақты бейбітшілік орнату үшін барлық мүмкіндікті пайдалану қажеттігін ерекше атап өтті. Сонымен қатар, ол Ватикандағы алғашқы баспасөз жиынында әлемдік журналистерге бейбітшілікке басымдық беретінін жеткізді. 90 елден 7 мыңнан астам журналист Ватиканда аккредиттелген.
Папа Лев XIV Газа секторындағы күрделі жағдайды сөз етіп, гуманитарлық көмек көрсетудің маңызды екенін айтты және барлық тұтқындарды босатуға үндеді. Сондай-ақ, Үндістан мен Пәкістан арасындағы қақтығыстың тоқтағанын құптай келе, алдағы келіссөздердің табысты өтетініне үміт білдірді.
Понтифик қасиетті Петр алаңына жиналған 100 мыңға жуық адамға арнаған сөзінде Иоанн Павел II-нің «Қорықпаңдар!» деген қанатты сөзін еске алып, бейбітшілік пен әлеуметтік әділеттілікке шақырды.
Айта кетейік, жуырда Роберт Прево жаңа Рим Папасы болып сайланды.
Кілтсөздер: Рим Папасы, Лев XIV, бейбітшілік, Екінші дүниежүзілік соғыс, Украина, Газа секторы, Пәкістан, Үндістан, Ватикан, понтифик, Роберт Прево.
Фото: inform.kz сайтынан алынды