Бу ҳақда EurasiaPluse ахборот агентлиги хабар берди.
Фото: ДХХ
ДХХ тезкор тадбирида Самарқандда хорижлик фуқаро ва унинг 4 нафар оила аъзосини АҚШга ишлаш учун юбориш эвазига 150 минг доллар сўраган шахс қўлга олинди. Яна бир гумонланувчи Буюк Британия паспортини сохталаштириш хизматлари учун пул олганда ушланди.
Фуқароларни АҚШга ноқонуний йўллар билан юборишга уринган маҳаллий ҳамда хорижий фуқароларнинг ҳаракатлари бартараф этилди, деб хабар берди Давлат хавфсизлик хизмати.
Тезкор тадбирда аниқланишича, Самарқанд шаҳрида яшовчи 1992 й.т. фуқаро ҳорижлик шахснинг ишончига кириб, уни ва 4 нафар оила аъзосини жами 150 минг доллар эвазига Туркия орқали АҚШга ишлаш учун юборишини айтган. У виза ҳужжатларини мансабдор танишлари орқали тайёрлаб бериши учун олдиндан 15 минг доллар олган вақтида ушланди.
Шу каби ҳолатда пойтахтда вақтинча яшовчи 2004 й.т. хорижий фуқаро бошқа чет элликка Буюк Британиянинг сохта фуқаролик паспортини тайёрлатиб бериш имконияти борлигини айтган. Мазкур сохта паспортлар ёрдамида АҚШга Туркия ва БАА орқали жўнатиб юбориши эвазига жами 25 минг доллар талаб қилган. У олдиндан 12,5 минг доллар билан қўлга тушди. Шунингдек, унинг яшаш хонадонидан қалбаки паспорт ва ID-карталар ҳам ашёвий далил сифатида олинди.
Ҳар иккала ҳолатлар юзасидан Жиноят Кодексининг 168-моддаси 4-қисми «а» банди (Жуда кўп миқдорда фирибгарлик) ва 28,211-моддаси 3-қисми «а» банди (Жуда кўп миқдорда пора бериш) билан жиноят ишлари қўзғатилиб, тергов ҳаракатлари олиб борилмоқда.
Аввалроқ Миграция агентлиги фуқароларни хорижга ишга юбориш билан лицензиясиз шуғулланаётган ташкилотларга нисбатан қатъий чоралар кўраётганини маълум қилганди, хусусан, учта фирма жаримага тортилган. Агентлик фуқароларни шубҳали консалтингларга ишонмаслик ва фақат расмий агентликларга мурожаат қилишга чақирди.
Фото: gazeta.uz сайтидан олинди