Бу ҳақда EurasiaPluse ахборот агентлиги хабар берди.
Фото: ice.gov
АҚШ Иммиграция ва божхона назорати хизмати Ўзбекистон фуқароси Улуғбек Давроновни қўлга олди. 21 ёшли муҳожир АҚШ ҳудудида ноқонуний равишда бўлган, шунингдек, бир қатор жинсий жиноятларда айбланмоқда. У ҳибсда.
28 апрель куни АҚШ Иммиграция ва божхона назорати хизмати (ICE) ходимлари 21 ёшли Ўзбекистон фуқароси Улуғбек Давроновни қўлга олди. Аниқланишича, у АҚШ ҳудудида ноқонуний равишда бўлган ва ҳозирда бир қатор оғир жинсий жиноятларда айбланмоқда.
Давроновга қўйилган айбловлар орасида номусга тегиш (розилик берилмаган тарзда оғизга жинсий алоқа), тан жароҳати етказиш мақсадида ҳужум қилишга уриниш ва жинсий зўравонлик (жинсий алоқа қилишга мажбурлаш) кабилар бор.
Давронов илк бор АҚШ чегара хизматига 2022 йил 28 декабрда Аризона штатининг Луквилл шаҳри яқинида рўбарў келган. У иммиграция хизмати рухсатисиз ва розилигсиз Мексикадан АҚШга ноқонуний равишда кириб келган бўлган. Чегара хизмати ходимлари уни ҳибсга олиб, мамлакат ҳудудидан чиқариб юбориш жараёнини бошлаган. 2023 йил 28 июлда иммиграция бўйича судья уни АҚШдан сиртдан чиқариб юборишга қарор қилган.
Квинс округи жиноят ишлари бўйича суди 19 февралда Давроновга юқорида айтиб ўтилган айбловларни эълон қилган. ICE`нинг Нью Йорк бўлими Давроновни мамлакатдан чиқариб юборилиши лозим бўлган жиноятчи чет эл фуқароси сифатида аниқлаган ва ўша куниёқ Квинс Марказий қамоқхонасига иммиграция ушлаб туриш тўғрисида хабар юборган. Эртаси куни Квинс округи Марказий қамоқхонаси ICE`нинг талабини бажармаган ва унинг озод қилингани ҳақида хабар бермаган ҳолда Давроновни қўйиб юборган.
ICE`нинг Нью Йорк бўлими ходимлари ва Homeland Security Investigations махсус агентлари мақсадли операция давомида Давроновни Статен-Айлендда қўлга олиб, уни ICE офисига олиб кетган. Ҳозирда у ICE ҳибсхонасида сақланмоқда.
Аввалроқ болаларни жинсий эксплуатация қилиш билан боғлиқ учта жиноий ишда айбдор деб топилган Ўзбекистон фуқароси АҚШдан депортация қилингани ҳақида ёзгандик. Депортация Аризона штатининг Феникс шаҳрида амалга оширилган.
Фото: gazeta.uz сайтидан олинди