Бу ҳақда EurasiaPluse ахборот агентлиги хабар берди.
Фото: Uzbekistan Airports
Hunnu Air авиакомпанияси сентябрь ойидан бошлаб Тошкент ва Улан Батор ўртасида тўғридан-тўғри мунтазам қатновларни йўлга қўяди. Парвозларни Embraer 190 самолётларида ҳафтасига икки марта амалга ошириш режалаштирилмоқда.
Мўғулистоннинг Hunnu Air авиакомпанияси сентябрь ойидан бошлаб Ўзбекистонга парвозларни йўлга қўймоқда, дея хабар қилди Uzbekistan Airports.
Қайд этилишича, компания Мўғулистоннинг Hunnu Air авиакомпанияси билан музокараларнинг иккинчи босқичини ўтказди. Йиғилишда иштирок этиш учун авиакомпания бош директори Пуревжав Мунхжаргал Тошкентга келди.
Томонлар Тошкент ва Улан Батор ўртасида тўғридан-тўғри мунтазам йўловчи қатновларини ташкил этиш билан боғлиқ масалаларни муҳокама қилди. Авиакомпания 2025 йилнинг сентябрь ойидан бошлаб Embraer 190 самолётларида ҳафтасига икки марта парвозларни амалга оширишни режалаштирмоқда.
Музокараларда, шунингдек, Мўғулистон авиаташувчиси раҳбари Тошкентни нафақат истиқболли, сайёҳлар ва ишбилармонлар учун қизиқарли манзил, балки Мўғулистон ва қўшни давлатлар йўловчиларининг парвозлари учун кенг имкониятлар очиб берувчи транзит хаб сифатида ҳам кўришини таъкидлади.
Hunnu Air — 2011 йилда ташкил этилган ва штаб-квартираси Улан Батор шаҳрининг Чингизхон халқаро аэропортида жойлашган хусусий мўғул авиакомпанияси. Авиакомпания ички ва халқаро парвозларни АТР 72−500 ва Embraer 190 самолётларида амалга оширади.
Фото: gazeta.uz сайтидан олинди