Бұл туралы EurasiaPluse ақпарат агенттігі хабарлады.
АҚШ-тың бірнеше штаты федералды қаржыны қысқартуға қарсы сотқа жүгінді
Калифорния, Иллинойс, Нью-Джерси, Род-Айленд және Мэриленд бас прокурорлары федералды үкіметтің төтенше жағдайларға, көлік пен лаңкестікке қарсы күреске бөлінетін қаржысын қысқартқаны үшін сотқа шағым түсірді. Бұл бастаманы Колорадо, Коннектикут, Делавэр, Гавай, Мэн, Массачусетс, Мичиган, Миннесота, Невада, Нью-Мексико, Нью-Йорк, Орегон, Вермонт, Вашингтон және Висконсин штаттары қолдады.
Шағымданушылардың айтуынша, Төтенше жағдайларды басқару федералды агенттігі мен Ішкі қауіпсіздік министрлігі, сондай-ақ Көлік департаменті арқылы бөлінетін маңызды шығындарды қысқарту заңсыз. Олар федералдық билік штаттарды Дональд Трамп әкімшілігінің саясатын қабылдауға мәжбүрлеп отыр деп есептейді. Көптеген штатта бас прокурорлар мен губернаторлар – демократтар.
Калифорния бас прокуроры Роб Бонта президент Трамптың өмірге қажетті қаржыны мән бермей, «ұсақ ақша» ретінде қарап отырғанын атап өтті. Бұған дейін Ақ үй, егер штаттар иммиграциялық саясатта толықтай қолдау көрсетпесе, федералды қаржылай көмекті тоқтататыны туралы екі жарлық шығарған еді.
АҚШ әкімшілігінің өкілі Куш Десаи бұл айыптауларға жауап ретінде, «Демократ прокурорлар саяси ойынмен айналыспай, Трамп әкімшілігімен бірге заңсыз иммигрант-гангстерлерге қарсы күрессе, бұл елге тиімді болар еді», – деді.
Айта кетейік, осыған дейін 12 штат президент Трамптың баж салығына қатысты да сотқа жүгінген болатын.
Кілтсөздер: АҚШ, федералды қаржы, сотқа шағым, Трамп, штаттар, төтенше жағдай, иммиграция, демократтар, қауіпсіздік, заңсыз иммигрант, қаржыландыру.
Фото: inform.kz сайтынан алынды