Бұл туралы EurasiaPluse ақпарат агенттігі хабарлады.
Ақ үйде Ұлттық қауіпсіздік кеңесінің жүзден аса қызметкері жұмыстан босатылды
АҚШ-тың Ұлттық қауіпсіздік кеңесінің (ҰҚК) жүзден астам қызметкері әкімшілік демалысқа жіберілді. Бұл жөнінде америкалық БАҚ дереккөздерге сілтеме жасай отырып хабарлады. ҰҚК аппаратының жетекшісі Брайан Маккормак қызметкерлерге жұмыс орнын жинастыру үшін небәрі 30 минут уақыт беріледі деген электронды хат жолдағаны айтылды. Сондай-ақ, босатылғандарға кез келген ыңғайлы уақытта жеке заттарын алып, электронды құрылғыларды тапсыру мүмкіндігі қарастырылған.
Америкалық ақпарат құралдарының дерегінше, бұл қысқарту ҰҚК-нің кем дегенде жарты қызметкерін қамтыған. Ақ үйдің жоспары бойынша, барлығы 350-ге жуық адам жұмыс істейтін кеңестің жартысы жұмыстан босатылады. Дереккөздердің айтуынша, ҰҚК-ны құрылымдық тұрғыдан түбегейлі жаңарту мамырдың соңына дейін толық аяқталуы тиіс.
Трамп пен ҰҚК – сенімсіздік пен реформалар
Ұлттық қауіпсіздік кеңесі АҚШ сыртқы саясатын үйлестіру мен қалыптастыруда аса маңызды рөл атқарады. Оған көбіне түрлі министрліктерден тәжірибелі мамандар тартылады. Дегенмен, Дональд Трамп кеңес жұмысына сенімсіздік білдіріп, оның қызметкерлері президентке толықтай адал емес деп есептейді.
Бүгінде ҰҚК құрамын уақытша АҚШ Мемлекеттік хатшысы Марко Рубио басқарады. Оның айтуынша, кеңестегі кадрлық өзгерістер президент Трамптың көзқарасына сай жүзеге асып жатыр. ҰҚК-нің басты міндеті – АҚШ президентіне толық бағыныштылықты арттыру. Сонымен қатар, кеңес құзырының бір бөлігін Мемлекеттік департамент, Қорғаныс министрлігі және Орталық барлау басқармасы секілді өзге агенттіктерге беру ұсынылуда.
Ақ үйдің бұл қадамдары Ұлттық қауіпсіздік кеңесін реформалау және ұлттық қауіпсіздік саласындағы басқаруды күшейту мақсатында қолға алынды. Еске сала кетейік, бұған дейін Дональд Трамп АҚШ-тың ядролық әлеуетін арттыруға қатысты төрт бірдей жарлыққа қол қойған болатын.
Кілтсөздер: Ақ үй, АҚШ, Ұлттық қауіпсіздік кеңесі, Трамп, ҰҚК, әкімшілік демалыс, қысқарту, ұлттық қауіпсіздік, АҚШ-тың сыртқы саясаты
Фото: inform.kz сайтынан алынды