Президент Қасым-Жомарт Тоқаев 15 наурыздағы референдумда қабылданған жаңа Конституцияны іске қосу үшін Үкімет пен Парламент басшыларының басын қосты, деп хабарлайды EurasiaPulse.com ақпарат агенттігі.
Ақордада өткен жиынға Парламенттің екі палатасының төрағалары – Мәулен Әшімбаев пен Ерлан Қошанов, Премьер-министр Олжас Бектенов және басқа да лауазымды тұлғалар қатысты. Президент «Қазақстан Республикасының Конституциясын іске асыру жөніндегі шаралар туралы» Жарлыққа қол қойғанын мәлімдеді.
Мемлекет басшысының айтуынша, алда елдің заңнамасын жаңа Конституцияға сәйкестендіру бойынша ауқымды жұмыс күтіп тұр. Ең алдымен, билік институттарының қызметін реттейтін негізгі заңдар түзетіледі.
Жалпы, алты конституциялық заң мен басқа да үш заңнамалық актіге өзгерістер мен толықтырулар енгізу жоспарланған. Бұл құжаттардың барлығын Парламенттің қазіргі сессиясы аяқталғанға дейін қабылдау керек.
Мемлекет басшысы заңдарды сапалы әрі уақтылы әзірлеп, қабылдауды тапсырды. Сондай-ақ Үкімет заңға тәуелді нормативтік-құқықтық актілерді кешіктірмей түзетуге тиіс.