Премьер-министр Олжас Бектенов Абай облысына жұмыс сапары барысында «Семей орманы» табиғи резерватына барып, орманды қорғауға арналған жаңа цифрлық технологиялардың жұмысын тексерді. Бұл – Мемлекет басшысы Қасым-Жомарт Тоқаевтың тікелей тапсырмасы болатын, деп хабарлайды EurasiaPulse.com ақпарат агенттігі.
Резерват аумағында Үкімет басшысына жасанды интеллект негізінде жұмыс істейтін орман және дала өртін ерте анықтайтын пилоттық жүйенің нәтижелері таныстырылды. Бұл технология өрт ошағын алыс қашықтықтан және кез келген ауа райында бірден байқай алады.
Дәл осы жерде Премьер-министр Олжас Бектенов, Экология және табиғи ресурстар министрі Ерлан Нысанбаев, Төтенше жағдайлар министрі Шыңғыс Әрінов және Абай облысының әкімі Берік Уәлидің көзінше орман өртінің алдын алу бойынша арнайы оқу-жаттығу өткізілді. Резерват мамандары мен өрт сөндірушілер цифрлық технологиялардың тиімділігін және қызметтердің өзара іс-қимыл алгоритмін іс жүзінде көрсетті.
Экология және табиғи ресурстар вице-министрі Нұрлан Құрмалаевтың айтуынша, заманауи тепловизорлық және оптикалық камералармен жабдықталған тәулік бойы жұмыс істейтін бейнебақылау кешендері өрт белгілерін бастапқы кезеңде автоматты түрде анықтайды. Түтін немесе өрт байқалған сәтте жүйе дереу Жедел басқару орталығына дабыл береді. Бұл өрт ошағын тез арада оқшаулап, жоюға мүмкіндік береді. Осындай орталықтар «Семей орманының» Абай облысының 7 ауданында орналасқан барлық 10 филиалында ашылған.
Президенттің тапсырмасы бойынша өртті ерте анықтау технологиясы бүкіл ел бойынша кезең-кезеңімен енгізіліп жатыр. «Қазақтелеком» АҚ өкілі Бахтияр Қожахметовтің баяндауынша, қазір Ақмола облысының бес орман шаруашылығында, Астана маңындағы екі қорықта, сондай-ақ Қарқаралы және Баянауыл табиғи парктерінде жұмыс жүріп жатыр. Іле-Алатау, Сайрам-Өгем ұлттық парктері мен «Көлсай көлдері» мемлекеттік ұлттық табиғи паркіндегі жұмыстар аяқталуға жақын. Үшінші кезең Шығыс Қазақстан облысының 10 орман шаруашылығы мен Қатонқарағай ұлттық паркiн қамтиды. Жалпы, осы жылдың шілде айында Қазақстанның өрт қаупі жоғары 24 табиғи паркі мен қорығын қамту жоспарланса, қыркүйекте барлық жүйе толық іске қосылады.
«Мемлекет басшысының тапсырмасымен біз орман қорын қорғаудың жаңа стандарттарын енгізіп жатырмыз. Орманды қалпына келтіріп қана қоймай, төтенше жағдайлардың алдын алуға бағытталған жүйелі шаралар қолға алынды. Президент айқындаған негізгі бағыттардың бірі – цифрландыру. Технологияны тікелей патрульдеумен толықтыру керегін ұмытпау керек. Сондықтан орман күзетінің жұмысы өрт қауіпті кезеңде тұрақты жүргізіліп, барлық қауіпті аймақты қамтуы тиіс. Бұл жұмыстар Президенттің «Таза Қазақстан» жалпыұлттық бастамасының міндеттеріне толық сәйкес келеді», – деп атап өтті Олжас Бектенов.
Соңында Премьер-министр жұмысты жеделдетіп, цифрлық технологияларды сапалы енгізуді тапсырды. Сондай-ақ Олжас Бектенов Краснокордон орманшылығы аумағына барып, «Семей орманы» шаруашылықтарының материалдық-техникалық базасын нығайту жұмыстарымен танысты.