Бұл туралы EurasiaPluse ақпарат агенттігі хабарлады.
Данияда зейнет жасы 69-ға дейін ұлғаюы мүмкін
Дания Парламенті зейнет жасын ұлғайту туралы жаңа заң қабылдады. CNN хабарлауынша, бұл бастаманы 81 депутат қолдап, 21 депутат қарсы дауыс берген. Енді заң бойынша 1970 жылдың 31 желтоқсанынан кейін туған азаматтар үшін зейнетке шығу жасы 69-ға дейін көтерілуі мүмкін. Бұған дейін елдегі орташа зейнет жасы — 67 жас болатын.
Еңбек министрі Ане Халсбо-Йоргенсен бұл шешім болашақ ұрпақтың әл-ауқатын қамтамасыз етуді мақсат етеді деп түсіндірді. Данияның Статистика басқармасының мәліметінше, елде 6 миллион халық бар, оның ішінде 60-69 жас аралығында шамамен 713 мың, ал 70-79 жастағы тұрғындар саны – 580 мыңға жуық.
Зейнетақы жүйесіне қатысты даниялық сақтандыру компанияларының дерегі бойынша, соңғы жылдары мемлекеттік зейнет жасына жетсе де жұмысын жалғастыратын азаматтар саны көбейген. F&P қауымдастығының мәліметінше, бүгінде зейнет жасынан асқан 80 мыңға жуық адам еңбек етуде. Бұған жақсы экономикалық ахуал, жұмыс берушілердің икемділігі, қосымша қаржылай ынталандыру және еңбекке деген қызығушылық себеп болып отыр.
Зейнетақымен қамтамасыз ету директоры Ян В. Хансен 2040 жылға қарай зейнет жасын 70-ке дейін көтеру даниялықтар үшін тосын жайт екендігін айтады. Оның айтуынша, қоғамда ұзақ жұмыс істеуге ынталылар қатары артып келеді.
Дания – зейнет жасын 60-тан жоғары белгілеу бойынша Еуропада алғашқылардың бірі. Бұл елде зейнетке шығу жасы әлемдегі ең жоғарылардың бірі саналады және Ливиямен қатар тұр. Мысалы, Францияда 2023 жылы зейнет жасын 64-ке көтеруге жаппай наразылық болған еді, ал Ұлыбританияда бұл көрсеткіш 2026-2028 жылдары 67 жасқа жетеді, кейін 68-ге дейін өсуі мүмкін. АҚШ-та да зейнетке шығу жасы ұқсас, бірақ әлеуметтік төлемдер 62 жастан басталады.
Зейнет жасын ұлғайту мәселесі қазір әлемнің көптеген елінде өзекті: өмір сүрудің ұзақтығы мен халықтың денсаулығы жақсарған сайын, егде жаста жұмыс істеушілер қатары көбейіп келеді. Дегенмен, АҚШ-тағы зерттеулердің көрсетуінше, көп жағдайда азаматтарды зейнетке шыққан соң жұмыс істеуге қаржы тапшылығы итермелейді.
Қазақстанда зейнет жасына қатысты өзгерістер 2025 жылы болмайтыны ресми хабарланды.
Фото: inform.kz сайтынан алынды