Бұл туралы EurasiaPluse ақпарат агенттігі хабарлады.
Германия заңсыз көші-қонға тосқауыл қояды
Германияның жаңа ішкі істер министрі Александр Добриндт елдегі көші-қон саясатына қатысты қатаң шаралар қолға алынатынын жариялады. Бұл өзгерістер Фридрих Мерцтің канцлер ретінде қызметіне кіріскен алғашқы күнінде мәлім болды. Мерц «Заңсыз кірмек болғандардың бәріне шектеу қойылады. Жарамды төлқұжаты жоқ адамдарға елге кіруге тыйым салынады», – деді. Бұл ереже Еуропалық Одақтағы қауіпсіз мемлекеттерден келген пана іздеушілерге де қатысты.
Ақпан айында Ашаффенбург қаласында елден шығарылуы тиіс ауған азаматы балаларға пышақпен шабуыл жасап, қайғылы оқиға тіркелді. Салдарынан марокколық бала мен неміс тұрғыны көз жұмды, үш адам жарақат алған. Осы оқиғадан кейін Германияда заңсыз миграция мен шекара қауіпсіздігі мәселесі өзекті тақырыпқа айналды.
Министр Добриндт федералды полицияға шекарадағы бақылауды күшейтуді және құжаттары жоқ мигранттарды елге кіргізбеуді тапсырды. Ереже ЕО және Швейцария арқылы алғаш рет келетіндерге қатысты.
Еске салсақ, 2015 жылы Ангела Меркель кезінде қабылданған шешім бойынша, пана сұраушылардың құжаты болмаса да, оларға Германия шекарасынан өтуге рұқсат берілген. Нәтижесінде, елге көптеген мигрант бақылаусыз кіріп, олардың басым бөлігі пана алу құқығына ие бола алмады. Бұл миграциялық бақылау мен қауіпсіздік мәселесін күрделендірді — Германияда заңсыз көші-қон мен қылмыстың өсуіне себеп болды.
Айта кетейік, бұған дейін Президент Қасым-Жомарт Тоқаев жаңа канцлер Фридрих Мерцті қызметіне сайлануымен құттықтаған. Еуроодақ басшылары да Мерцті жаңа қызметімен құттықтады.
Кілтсөздер: Германия, көші-қон, заңсыз миграция, шекара бақылауы, Фридрих Мерц, Александр Добриндт, пана іздеушілер, қауіпсіздік, Еуропалық Одақ.
Фото: inform.kz сайтынан алынды