Бұл туралы EurasiaPluse ақпарат агенттігі хабарлады. Иран мемлекеттік телевидениесінің хабарлауынша, Ішкі істер министрі Искендер Мумени құрбандар санының артуы мүмкін екенін жеткізді. Ол зардап шеккен 200 адамның ауруханалардан шығарылғанын, жалпы шығарылғандар саны 412-ге жеткенін атап өтті. Қазіргі уақытта ауруханаларда шамамен 300 адам емделуде.
Министр өрттің бақылауға алынғанын, бірақ оны толық сөндіру жұмыстарының әлі жалғасып жатқанын мәлімдеді.
Бұған дейін Бендер-Аббас портында болған жойқын жарылыс туралы ақпарат жарияланды. Жарылыстың себебі әзірге анықталмаған. Бастапқыда 47 адам жараланып, 8 адамның қаза тапқаны хабарланғанымен, кейін зардап шеккендер саны 750-ге жеткені белгілі болды. Оқиға орнынан түсірілген кадрларда порттың бір бөлігі қатты зақымданғаны анық байқалады.
Осы қайғылы оқиғаға байланысты Мемлекет басшысы Иран Президентіне көңіл айту жеделхатын жолдады. Сонымен қатар, Ирандағы жарылыс болған порттың Қазақстан үшін маңызы да нақтыланды.
Фото: inform.kz сайтынан алынды