Бұл туралы EurasiaPluse ақпарат агенттігі хабарлады.
TikTok-қа 530 млн еуро айыппұл: ЕО-ның деректерді қорғау заңын бұзды
Ирландияның Деректерді қорғау жөніндегі комиссиясы (DPC) TikTok компаниясына 530 миллион еуро айыппұл салды. Себебі, TikTok Еуропалық Одақтың деректерді қорғау талаптарын бұзған. Компания еуропалық қолданушылардың жеке мәліметтерін Қытайға жіберген және бұл деректер Қытай заңнамасымен жеткілікті қорғалмаған.
Бұдан бөлек, комиссия TikTok-тың ата-аналық компаниясы ByteDance-ке бұзушылықтарды жою үшін алты ай мерзім берді. Реттеуші органның айтуынша, TikTok-тың еуропалық қолданушылары жайлы ақпарат Қытайда сақталған. Бұл – ЕО-ның жеке мәліметтерді өзге елдердің үкіметіне беруге тыйым салатын ережелеріне қайшы келеді. Осылайша, TikTok-тың деректер қауіпсіздігі және жеке мәліметтерді қорғау саласындағы кемшіліктері айқындалды.
TikTok өкілдері бұл шешімге қарсы шағым түсіретінін, сондай-ақ Қытай билігінен ешқашан еуропалық азаматтар туралы деректер сұрауы болмағанын және басқа тараптарға бұл ақпарат берілмегенін мәлімдеді.
Айта кетейік, бұған дейін TikTok өз қызметкерлерін бүкіл әлем бойынша қысқартатыны туралы хабарлаған болатын.
Кілтсөздер: TikTok, деректерді қорғау, Еуропалық Одақ, жеке мәліметтер, айыппұл, Қытай, Құпиялық, ByteDance, Еуропа.
Фото: inform.kz сайтынан алынды