Бұл туралы EurasiaPluse ақпарат агенттігі хабарлады.
Израильдің әскери-саяси кабинеті Газа секторындағы операцияны кеңейту жоспарын мақұлдады
Израиль үкіметі Газа секторындағы әскери операцияны кеңейту туралы шешімді бірауыздан мақұлдады. Бұл жайында Times of Israel басылымы Израиль үкіметіндегі дереккөзге сілтеме жасап хабарлады. Израиль армиясының бас штабы дайындаған жаңа жоспарға сәйкес, армия Газа аумағын толық бақылауға алып, бейбіт тұрғындарды оңтүстікке көшіруді, ХАМАС ұйымына соққы беруді және гуманитарлық көмектің содырларға өтіп кетуін болдырмауды көздеп отыр.
Жергілікті БАҚ өкілдерінің айтуынша, бұл жоспары АҚШ президенті Дональд Трамп келесі аптада Таяу Шығысқа сапарынан кейін ғана жүзеге асады. Ал оған дейін тараптар атысты тоқтату мен кепілдегі адамдарды босату туралы келіссөз жүргізетін болады. Израиль телеарналары жаңа операция біртіндеп қолға алынып, алғашқы кезеңде әскерлер Газа секторының белгілі бір бөлігіне шоғырланатынын жеткізді.
Израильдің министрі Зеэв Элкин уақытша кесте Трамптың сапарына дейін келісімге келуге мүмкіндік береді деп есептейді. «Егер ХАМАС біздің талабымызды түсінсе, Трамптың сапарына дейін уақыт бар», – деді ол.
Газаға гуманитарлық көмек жаңа жолмен жеткізіледі
Сонымен қатар, Израиль министрлер кабинеті Газа секторына гуманитарлық көмекті қайта жеткізу жоспарын қабылдады. Енді гуманитарлық көмекті тарату механизмдері өзгеруде: азық-түлік пен басқа да қажеттіліктер халыққа халықаралық ұйымдар мен жеке мердігерлер арқылы тікелей жеткізіледі. Израильлік әскери күштер бұдан былай көмек таратумен айналыспайды, тек қауіпсіздікті қадағалаумен шектеледі. Бұл өзгеріс ХАМАС-тың гуманитарлық көмекті өз пайдасына қолдануын азайтуға бағытталған.
Жоспарға жалғыз қарсы шыққан – Израильдің Ұлттық қауіпсіздік министрі Итамар Бен-Гвир. Жаңа жоспар Газа секторындағы жағдай ушыққанда күшіне енеді.
Айта кетейік, Израиль армиясы наурызда АҚШ-тың қолдауымен бітім бұзылған соң, Газаға бағытталған жерүсті операцияларын жаңартқан еді. Содан бері анклавқа ешқандай гуманитарлық көмек жіберілген жоқ.
Халықаралық Қызыл Крест комитеті Газа секторындағы гуманитарлық жағдайды «толық күйреу шегінде» деп жариялады. Сонымен қатар, Халықаралық сот та Газадағы блокадаға байланысты Израильге қарсы шағымдарды қарастырып жатыр.
Еске сала кетейік, Израиль Газа секторындағы әскери операциясын кеңейтуді жоспарлап отырғанын бұған дейін хабарланған болатын.
Кілтсөздер: Израиль, Газа секторы, әскери операция, гуманитарлық көмек, ХАМАС, халықаралық ұйымдар, Дональд Трамп, Израиль армиясы, блокада.
Фото: inform.kz сайтынан алынды