Бұл туралы EurasiaPluse ақпарат агенттігі хабарлады.
LA28 Олимпиадасында әуе такси қызметі іске қосылуы мүмкін
2028 жылы Лос-Анджелесте өтетін жазғы Олимпиада ойындарында әуе такси қызметі қолжетімді болуы мүмкін. Бұл туралы LA28 ұйымдастыру комитеті ресми түрде мәлімдеді. Олимпиада және Паралимпиада ойындары кезінде көрермендер мен қала тұрғындарына арналған ұшатын такси қызметін Archer Aviation компаниясы ұсынбақ.
Archer Aviation әуе көліктері жанкүйерлерді спорт нысандарына тасымалдау үшін қолданылмақ. Компания басшысы Адам Голдштейн Олимпиада аясында Лос-Анджелестегі көлік жүйесін өзгертуді және болашақтың транспортын қалыптастыруды мақсат етіп отырғанын атап өтті.
Ұшатын такси қызметі бұған дейін де өзекті мәселе болған. Мысалы, 2024 жылғы Париж Олимпиадасында да іске қосу жоспарланған еді, бірақ қажетті еуропалық сертификаттың болмауы бұл бастаманы кейінге қалдырды. АҚШ-та да дәл осындай жағдай орын алып отыр: Archer Aviation компаниясы әзірге Федералдық авиация басқармасынан сертификат алмаған. Сондықтан коммерциялық әуе такси қызметі әлі толық іске қосылмаған.
Егер компания алдағы уақыттарда қажетті рұқсаттарды ала алса, 2028 жылғы Олимпиадада әуе такси Лос-Анджелес қаласының негізгі нүктелері мен спорт алаңдарын 10-20 минутта байланыстыруға мүмкіндік береді. Әуе такси қызметінің бағасы әзірге белгісіз, бірақ пайдаланушылар мобильді қосымша арқылы тапсырыс бере алады.
Айта кетейік, бұған дейін Олимпиада және Паралимпиада ойындарының жүлдегерлері сыйақы алатыны да хабарланған.
Кілтсөздер: әуе такси, Олимпиада ойындары, Лос-Анджелес, LA28, Archer Aviation, спорт нысандары, ұшатын такси, Олимпиада жаңалықтары, жаңа көлік түрі, Олимпиада 2028.
Фото: inform.kz сайтынан алынды