Бұл туралы EurasiaPluse ақпарат агенттігі хабарлады.
Мексикада сайлау алдындағы қанды шабуыл: мэрлікке үміткер оққа ұшты
Веракрус штатының Тексистепек қаласында сайлауға байланысты қайғылы оқиға орын алды. CNN мәліметі бойынша, мэрлікке үміткер Есения Лара Гутьерес Facebook арқылы сайлаушылармен тілдесіп жүргенде, белгісіз біреулер оқ жаудырған. Шабуыл кезінде жиырмадан астам оқ атылып, нәтижесінде Гутьерес пен оның қолдау тобынан үш адам қаза тапты. Тағы үш кісі ауыр жарақат алған.
Мексика президенті Клаудиа Шейнбаум таңертеңгі баспасөз конференциясында бұл қайғылы жағдайды растады. Ол қазіргі таңда шабуылдың себептері анықталмағанын айтты. Мемлекет басшысы құрбандарға барлық қажетті қолдау көрсетілетінін, тергеу жұмыстары федералды деңгейде де бақыланатынын мәлімдеді.
— Біз Веракрус пен Дурангода қауіпсіздік шараларын күшейтіп, сайлау кезінде тұрғындардың қауіпсіздігін қамтамасыз ете аламыз, — деді президент.
Тексистепек қаласы Веракрус штатында орналасқан және мұнда 1 маусым күні жергілікті сайлау өтеді. Қалада 22 мыңға жуық тұрғын бар.
Айта кету керек, Мексикадағы сайлау кезеңдерінде саяси кандидаттарға шабуыл жиілеген. Data Cívica құқық қорғау ұйымының дерегі бойынша, былтыр елде саясаткерлер мен олардың ғимараттарына 661 шабуыл тіркелген. Олардың басым бөлігін муниципалдық деңгейде жұмыс істейтін шенеуніктер құраған.
Сондай-ақ, жақында Мексика Google компаниясын сотқа бергені хабарланған еді.
Кілтсөздер: Мексикадағы сайлау, мэрлікке үміткерге шабуыл, Веракрус жаңалықтары, саяси зорлық-зомбылық, Тексистепек оқиғасы
Фото: inform.kz сайтынан алынды