Бұл туралы EurasiaPluse ақпарат агенттігі хабарлады.
Tesla Илон Масктың орнына жаңа бас директор іздеуде
Tesla компаниясының директорлар кеңесі Илон Масктың орнына жаңа басшылық іздеу жұмысын бастап кетті. Бұл туралы беделді Wall Street Journal басылымы дереккөздерге сүйене отырып хабарлады.
Ақпаратқа сәйкес, электромобиль өндірушінің акциялары құлдырағаннан кейін және Масктың Ақ үйдегі жұмысына тым көп уақыт бөлгеніне байланысты, директорлар кеңесі компанияға жаңа басшы қажет деген байламға келген. Tesla басшылары жаңа бас директор табу мақсатында бірқатар компанияларға да жүгінген.
Алайда, Илон Маск өзінің X әлеуметтік желісіндегі парақшасында бұл мәліметті жалған әрі "этиканы өрескел бұзу" деп мәлімдеді. Сонымен қатар, компанияның X желісіндегі парақшасында Tesla директорлар кеңесінің төрағасы Робин Денхолм Илон Масктың бас директор қызметінде қала алатынына сенім білдіргенін жеткізді.
Соңғы уақытта Илон Масктың АҚШ президенті Дональд Трамп әкімшілігіндегі жұмысында белсенділігі өз кезегінде электромобиль өндіруші компанияға қарсы бойкот пен наразылық шараларына себеп болған. Масктың иммиграциялық заңдарды қатаңдату мен әлеуметтік бағдарламаларды қысқарту туралы мәлімдемелері де қоғамда сын туғызуда.
Биыл мамырда Илон Маск мемлекеттік қызметке аз уақыт бөлетінін айтып, 30 мамырға дейін Үкіметтің тиімділігі департаменті (DOGE) басшысы қызметінен кететінін хабарлады. Бұған дейін де Маск Трамп әкімшілігіндегі жұмыс уақытын қысқартуды жоспарлаған.
Кілтсөздер: Tesla жаңалықтары, Илон Маск, жаңа бас директор, электромобиль, акциялар, Tesla басқармасы, АҚШ, Трамп әкімшілігі, бойкот, директорлар кеңесі.
Фото: inform.kz сайтынан алынды