Бұл туралы EurasiaPluse ақпарат агенттігі хабарлады.
Сауд Арабиясы қажылыққа заңсыз кіруге бақылауды күшейтті
Сауд Арабиясы үкіметі қажылық маусымы кезінде қасиетті Мекке қаласына заңсыз кіруге қатаң тыйым салды. Бұл жөнінде Al Jazeera агенттігі елдің Ішкі істер министрлігіне сілтеме жасап хабарлады.
Жаңа талаптарға сәйкес, 11-ші ай — Зуль-кададан бастап, 12-ші ай — Зуль-хиджаның 14-іне дейінгі аралықта Мекке мен басқа да қасиетті жерлерге визасыз немесе қажылық визасы жоқ адамдардың өтуіне тосқауыл қойылады. Ережені бұзғандарға жүз мың сауд риалына (шамамен 26 600 АҚШ доллары) дейін айыппұл салынуы мүмкін. Ал заңсыз қажылыққа адамдарды тасымалдаған көліктер тәркіленуі ықтимал.
Сонымен қатар, ресми рұқсатсыз қажылық жасамақ болғандар 20 мың риал (шамамен 5 332 АҚШ доллары) көлемінде айыппұл төлейді. Виза режимін бұзған адамдар елден қуылып, 10 жылға дейін Сауд Арабиясына кіруге тыйым салынады.
Ішкі істер министрлігі қажылыққа арнайы рұқсаты жоқ барлық тұлғаларға бұл талаптардың қолданылатынын ескертті. Сауд Арабиясы билігі қажылардың қауіпсіздігін сақтау үшін азаматтар мен резиденттерді қажылық ережелерін қатаң ұстануға, құқықбұзушылықтар туралы хабарлауға шақырды.
Қазақстан мұсылмандары діни басқармасы да биыл заңсыз қажылық ұйымдастырған және қатысқан тұлғаларға ауыр айыппұлдар салынатынын ескертті.
Кілтсөздер: Сауд Арабиясы, қажылық, заңсыз қажылық, Мекке, айыппұл, қажылық ережелері, визалық режим, қауіпсіздік
Фото: inform.kz сайтынан алынды