Абай облысының әкімі Берік Уәли Семейдегі бірнеше ірі базардың жағдайына көңілі толмай, кәсіпкерлерге қатаң ескерту жасады. Ол сауда орындарының иелеріне жағдайды түзетуге үш ай уақыт беріп, одан кейін өзі келіп тексеретінін мәлімдеді, деп хабарлайды EurasiaPulse.com ақпарат агенттігі.
Облыс басшысы құқық қорғау және санитарлық-эпидемиологиялық қызмет өкілдерімен бірге қаладағы «Нива» сауда үйін, «Жансая» базарын және «Мың бастау» сауда орталығын аралады. Тексеріс барысында халық көп жиналатын орындардың абаттандыру және тазалық деңгейі талапқа сай емес екені анықталды.
Мәселен, 1985 жылы салынған «Нива» сауда үйінің алдында ескі дүңгіршектер тұр, баспалдақтары тазаланбаған, ал ғимараттың төбесінен су ағып тұр. «Жансая» базарының сыртқы келбеті де сын көтермейді: контейнерлер мен ішіндегі сауда бутиктері тозған.
Әкім бұл олқылықтарды «Таза Қазақстан» акциясы аясында тез арада жоюды тапсырды. Ол ескертуді елемеген кәсіпкерлерге айыппұл салынатынын қатаң ескертті. Полиция департаментінің мәліметінше, жыл басынан бері тазалық ережелерін бұзғандарға жалпы сомасы 12,3 млн теңге айыппұл салынған.
«Талап – барлығына ортақ. Қаланың қақ ортасында тұрған сауда орындарындағы тазалықтың мұндай деңгейде болуы мүлдем дұрыс емес. Семей – ортақ үйіміз, оны таза ұстау – әрқайсымыздың міндетіміз. Ескертуді елемегендерді жауапқа тартып, айыппұл саламыз. Кәсіпкерлер табыстарының бір бөлігін абаттандыруға жұмсауы тиіс», – деді Берік Уәли.
Енді сауда орындарының басшылары мен қала әкімдігі үш ай ішінде базарларды жаңғырту және абаттандыру бойынша нақты жобаларын ұсынуы тиіс. Берік Уәли белгіленген мерзімнен кейін нысандарды арнайы келіп тексеретінін айтты.