Бұл туралы EurasiaPluse ақпарат агенттігі хабарлады.
Түркия Қара теңізде жаңа газ кен орнын ашты
Түркияның энергетика және табиғи ресурстар министрлігінің мәліметінше, Қара теңіздегі Сакарья газ кен орнындағы Göktepe-3 учаскесінде жүргізілген 49 күндік бұрғылау нәтижесінде көлемі 75 миллиард текше метр табиғи газ қоры табылды. Бұл кен орнының нарықтық құны шамамен 30 миллиард долларға бағаланып отыр.
Алдын ала есеп бойынша, жаңа газ қоры Түркияның ішкі сұранысын 3,5 жыл бойы қамтамасыз ете алады. Бұл Түркияның энергетикалық тәуелсіздігін арттырып, елдің жанармай импортына тәуелділігін азайтуға бағытталған ауқымды стратегиясының маңызды бөлігі саналады.
Энергетика министрі Алпарслан Байрактардың айтуынша, Göktepe-3 учаскесіндегі табиғи газ өндірісін жеделдету жоспарда бар. Жаңа кен орнының іске қосылуы Түркияның аймақтағы энергетикалық ықпалын күшейтіп, отын импорттауға кететін шығынды төмендетуге сеп болады.
Министрдің мәлімдеуінше, Göktepe-3-тегі газдың табылуы — Қара теңіз қайраңы әлеуетінің жоғары екенін және Түркияның энергетика саласындағы инфрақұрылымдық жетістіктерін көрсетеді.
Айта кетейік, бұған дейін Түркия жаңа Ыгдыр–Нахчыван газ құбыры арқылы Әзербайжанға газ экспортын ресми түрде бастаған болатын. Көгілдір отын енді осы бағытпен жеткізіледі.
Кілтсөздер: Түркия, табиғи газ, Қара теңіз, Göktepe-3, Сакарья газ кені, энергетика, газ қоры, энергетикалық тәуелсіздік, газ экспорты, инфрақұрылым.
Фото: inform.kz сайтынан алынды