Бұл туралы EurasiaPluse ақпарат агенттігі хабарлады.
Telegram кірісі рекордтық көрсеткішке жетті: 2024 жылы мессенджер қанша пайда тапты?
2024 жылы Telegram өзінің қаржылық табыстарымен жұртты таңғалдырды. Мессенджердің жылдық кірісі 1,4 миллиард долларға дейін өсіп, былтырғы көрсеткіштен төрт есе артты. Былтыр компания 343 миллион доллар ғана кіріс тапса, 173 миллион доллар көлемінде шығынға ұшыраған еді. Бұл жетістік Telegram-ның негізін қалаушы Павел Дуровқа қатысты Францияда басталған тергеулер мен қатаң қысым кезінде тіркеліп отыр.
Financial Times мәліметтері бойынша, бұл қаржылық ақпарат инвесторларға жаңа 1,5 миллиард долларлық облигацияларды ұсынардың алдында жарияланған. Telegram облигацияларын сату науқаны жақында басталып, жақын күндері аяқталуы мүмкін.
Telegram-ның негізгі табыс көздері – белсенді қолданушылар саны, премиум жазылымдар және TON блокчейні мен Toncoin криптовалютасына негізделген серіктестіктер арқылы келіп отыр. Сондай-ақ, платформа әзірлеушілерге сауда, ойын және түрлі сервис қосымшаларын енгізуге мүмкіндік беріп, одан қосымша пайда түсіруде.
2024 жылы Telegram табыс құрылымы былайша бөлінді:
- Жарнама — 250 млн доллар
- Премиум жазылымдар — 292 млн доллар
- TON экожүйесі мен серіктестік жобалар — жалпы кірістің жартысына жуығы
Компания 2025 жылға дейін табысын 2 миллиард долларға дейін жеткізуді, ал таза пайдасын 720 миллион долларға ұлғайтуды жоспарлап отыр. Қолма-қол қаржы қоры да 530 миллион долларға жеткен.
Телеграм IPO және Францияда қысым
Telegram бұдан бөлек IPO-ға (акцияларды ашық нарықта сату) шығу мүмкіндігін де қарастырып отыр. Алайда Франция билігінің Павел Дуровқа тосқауыл қоюы бұл жоспарға кедергі болуы мүмкін. Франция мен БАӘ азаматтығы бар Telegram басшысы платформада тыйым салынған контент пен терроризмге қатысты материалдардың таралуы үшін айыпталуда. Дуровтың пікірінше, бұл әрекеттердің саяси астары бар, себебі Францияның барлау қызметі Telegram арқылы саяси контентті шектеуге тырысқан.
Заңды қиындықтарға қарамастан, Telegram жасанды интеллект бағытында жаңа серіктестіктерге бет бұрып, Илон Масктың xAI стартапына тиесілі Grok чат-ботын монетизациялауды жоспарлап отыр.
Бүгінгі күні Telegram-да ай сайын 1 миллиардтан астам белсенді қолданушы бар. Мессенджер небары 60 қызметкерден тұратын шағын командамен жұмыс істейді, ал модерация қызметі негізінен аутсорсинг арқылы атқарылады.
Telegram – қазіргі заманның сұранысын толық қамтамасыз етіп отырған ірі, қауіпсіз және көп функциялы мессенджер ретінде өз позициясын нығайта түсуде.
Фото: inform.kz сайтынан алынды