Мемлекет басшысы Қасым-Жомарт Тоқаев қазақстандықтарды Ұлыстың ұлы күнімен құттықтап, елдегі маңызды бастаманың жай ғана науқан емес екенін атап өтті, деп хабарлайды EurasiaPulse.com ақпарат агенттігі.
Президент өз сөзінде Наурыздың тазару мен жаңару уақыты екенін еске салды. Оның айтуынша, бұл ең алдымен, ой мен ниет тазалығын білдіреді.
«Баршаңызды Ұлыстың ұлы күні – әз-Наурыз мейрамымен шын жүректен құттықтаймын!»
Сондай-ақ Тоқаев екі жыл бұрын басталған «Таза Қазақстан» жалпыұлттық акциясына тоқталды. Ол бұл ауқымды жобаның халық, әсіресе жастар тарапынан жаппай қолдау тапқанын жеткізді.
«Азаматтарымыз тазалықты құр сөзбен емес, нақты ісімен көрсетуде. Ұқыптылық, жинақылық, тиянақтылық қасиеттері ұлтымыздың жаңа сапасына айнала бастады», – деді Мемлекет басшысы.
Президент «Таза Қазақстан» бастамасы кезекті саяси науқан немесе үгіт-насихат емес, мемлекеттің мызғымас идеологиясы екенін мәлімдеді. Ол бұл игі істі жыл бойы жалғастырып, ұлт болмысының ажырамас бөлігіне айналдыру керегін баса айтты.
«Ең бастысы елімізге амандық, жерімізге тыныштық тілеймін. Қасиетті Отанымыз – Қазақстан Республикасы мәңгі жасасын! Ата заңымыз өз тұғырынан түспесін! Туымыз биікте желбіресін! Ұлыс оң болсын, ақ мол болсын! Еліміздің төрт құбыласы түгел болсын!» – деп түйіндеді сөзін Қасым-Жомарт Тоқаев.