АҚШ Президенті Дональд Трамп Майамиде өткен инвестициялық форумда сөйлеген сөзінде Сауд Арабиясының тақ мұрагері Мұхаммед бен Салманға қатысты ауыр сөз айтты, деп хабарлайды EurasiaPulse.com ақпарат агенттігі.
Трамп АҚШ пен Сауд Арабиясының қарым-қатынасын талқылай келе, ханзада туралы өз ойын жасырмады.
«Мұхаммед бен Салман менің көтімді сүюі керек», — деді АҚШ Президенті.
Оның сөзінше, ханзада бұрын оны бағаламаған. Трампты құлдырап бара жатқан елдің «жолы болмаған кезекті президенті» болады деп ойлаған. Енді Сауд басшылығы оған көбірек құрмет көрсетуі тиіс, деп санайды Трамп.
Бірнеше күн бұрын ғана Трамптың ханзаданы «жауынгер» деп атап, Сауд Арабиясы АҚШ-пен бір жақта екенін мәлімдегені белгілі.
Бұл мәлімдеме Таяу Шығыстағы жағдайдың күрт ушығуымен тұспа-тұс келді. 28 ақпанда АҚШ пен Израиль Иранға қарсы әскери операция бастаған. Оған жауап ретінде Тегеран Израиль мен АҚШ-тың аймақтағы әскери нысандарына, соның ішінде Сауд Арабиясы, Бахрейн, Катар, Кувейт және БАӘ-дегі базаларына зымырандармен және дрондармен соққы беруде.
Сонымен қатар Иран әлемдік теңіз мұнай тасымалының 30%-ға жуығы өтетін Ормуз бұғазын жауып тастаймыз деп сес көрсетті. Парсы шығанағы елдерінің мұнай инфрақұрылымына да шабуылдар жасалып жатыр. Осындай жағдайда Вашингтонның аймақтағы негізгі одақтастарымен қарым-қатынасының маңызы арта түсті.