Бұл туралы EurasiaPluse ақпарат агенттігі хабарлады.
Қытай–Қырғызстан–Өзбекстан теміржолы: стратегиялық жобаның құрылысы басталды
Қытайдың Синьхуа агенттігінің хабарлауынша, Қытай–Қырғызстан–Өзбекстан теміржолының Қырғызстан аумағындағы маңызды бөліктері – Ферғана, Нарын-1 және Кош-Төбө туннельдерінің құрылысы сәуір соңында басталды. Бұл – халықаралық теміржол жобасының нақты құрылыс кезеңіне кіріскенін көрсетеді.
Ұзындығы 10 шақырымнан асатын бұл үш туннель бір бағытты және бір жолақты болмақ. Теміржол дәлізі Қытай, Қырғызстан және Өзбекстан арасындағы көлік қатынасын жақсартуға арналған аса маңызды стратегиялық инфрақұрылымға айналады. Жобаның аймақтық ерекшелігіне байланысты құрылыс жұмыстарын биік тауларда, қатал климатта, сейсмикалық белсенді әрі геологиялық тұрғыдан қиын аумақта жүргізу оңай емес.
Айта кетейік, былтыр маусым айында үш ел үкіметі Қытай–Қырғызстан–Өзбекстан теміржолын салу бойынша ресми келісімге қол қойған болатын. Осылайша, 27 жыл бойы кейінге шегеріліп келген жоба іске аса бастады.
Lianhe Zaobao басылымының жазуынша, жаңа магистраль Қытайдың Қашғар қаласынан басталып, Торғат асуы арқылы Қырғызстанға өтеді, одан әрі Жалалабад қаласы арқылы Өзбекстанның шығысындағы Әндіжанға дейін созылады. Жобаның жалпы ұзындығы – 523 шақырым.
Болашақта Қытай–Қырғызстан–Өзбекстан теміржолы Таяу Шығыс, Оңтүстік Азия мен Еуропаны байланыстыратын ауқымды көлік дәлізіне айналуы мүмкін. Сарапшылар бұл теміржол Орталық Азиядағы экономикалық ынтымақтастықты дамытуға және аймақтың транзиттік әлеуетін арттыруға үлкен үлес қосады деп санайды.
Кілт сөздер: Қытай–Қырғызстан–Өзбекстан теміржолы, халықаралық теміржол, транзиттік дәліз, Орталық Азия, инфрақұрылым жобасы, көлік байланысы.
Фото: inform.kz сайтынан алынды