Бұл туралы EurasiaPluse ақпарат агенттігі хабарлады.
Жапонияда күріш бағасы қымбаттап, министрдің мәлімдемесі дау тудырды
Соңғы уақытта Жапонияда күріш бағасы күрт қымбаттап кетті. Осындай жағдайда Жапонияның ауыл шаруашылығы министрі Таку Это елді дүрліктірген мәлімдеме жасады. Министрдің айтуынша, “мен күріш сатып алмаймын, себебі жақтастарым маған оны жеткілікті береді, тіпті артық күрішті сатып та жіберуге болар еді”, — деді ол қаражат жинау шарасында.
Күріш бағасының өсуіне ең басты себеп — өткен жылмен салыстырғанда, өнім көлемі азайып, нарықта тапшылық туындағаны. Осыған байланысты Жапония үкіметі мемлекеттік қордағы күрішті нарыққа шығару туралы шешім қабылдады, алайда бұл шаралар наурыз айында ғана жүзеге аса бастады. Баға өткен жылдың күзінен бері тұрақты түрде өсуде.
Министрдің сөзі қоғамда резонанс тудырып, Жапония премьер-министрі Сигэру Исиба бұл мәлімдемені “өте орынсыз” деп бағалады. Ол министрді өзі тағайындағаны үшін жұртшылық пен журналистерден кешірім сұрады. “Бұл үшін мен де жауаптымын”, — деп атап өтті ол.
Күріш нарығындағы ахуал жапон халқы үшін ауыр соғуда, себебі азық-түлік пен энергия бағасының өсуінен халық бұрыннан зардап шегіп келеді. Kyodo агенттігінің сауалнамасы бойынша, респонденттердің 87%-ы үкіметтің күріш бағасын тұрақтандыру әрекеттеріне көңілі толмайды. Сонымен қатар, Исиба кабинетін қолдау бүгінде бұрын-соңды болмаған төмен деңгейге түсті.
Айта кетейік, күріш тапшылығын жою мақсатында Жапония жақында ғана Оңтүстік Кореядан күріш сатып ала бастаған болатын.
Кілтсөздер: Жапония, күріш бағасы, министрдің мәлімдемесі, күріш қымбаттауы, мемлекеттік қор, азық-түлік бағасы, күріш сатып алу, жапон халқы, премьер-министр Исиба.
Фото: inform.kz сайтынан алынды