Бул тууралуу EurasiaPluse маалымат агенттиги билдирди.
Turmush — Ош шаарынын 7 жаштагы тургуну Нурсултан кызы Лейли пластилинден түрдүү буюмдарды жасап, тапкан акчасын кайрымдуулукка жумшайт. Аймактык кабарчы жаш талант менен таанышты.
Лейли Ноокат районунда төрөлгөн. Үй-бүлөдө 4 бир туугандын улуусу. 1 иниси жана 2 сиңдиси бар. Кол өнөрчүлүккө болгон кызыгуусу бала бакчадан башталган. Жасаган кичинекей буюмдарын 15–20 сомдон, кышында жаңы жылдык кооздуктарды 100 сомдон сатып келет. Тапкан акчасын кайрымдуулукка коротот. Азыр №20 Исхак Раззаков атындагы мектептин 1-классын аяктап жатат.
«Бул өнөрдү бала бакчага барганда эжекемден үйрөнгөм. Кийинчерээк жакшы жасай баштадым. 5 жашымдан бери жасап келем. Үй-бүлөмдө мындай буюмдарды жасагандар жок», – деди ал.
Чоң энеси Токторова Бусалима небереси жакшы окуй турганын кошумчалады.
«Неберем көргөн нерсесин окшоштуруп жасайт. Сыналгыдан мультфильм көрсө же көчөдөн бир нерсе көрсө, баарын өз колу менен жасап коёт. Лейли үйдө жөн отурбайт, дайыма бир нерсе жасашым керек деп жасап олтурат. Мектепте да жакшы окуйт», – деди ал.
Апасы Шермат кызы Акманай кызынын максаттары чоң экенин айтты.
«Лейли атайын блокнот ачып, максаттарын жазып турат. Британия, Бразилия, Түркия сыяктуу өлкөлөргө баргысы келет. Эл аралык сынактаргы катышуу — чоң кыялы. Бишкекке барып, ажобуз менен жолугушууну да каалайт. Атасы дайыма колдоп, пластилин алып берип турат. Паспорт алгыла, чемоданымды даярдагыла. Мен 8 жашымда башка өлкөгө барышым керек, деп айтып калат», – деди апасы.
Сүрөт: akipress.org сайтынан алынды