Бул тууралуу EurasiaPluse маалымат агенттиги билдирди.
АКИpress – Жоокерлер арасындагы зордук-зомбулук маселеси курч турат деп айта албайм, деди коргоо министринин милдетин аткаруучу Руслан Мукамбетов 20-майда Жогорку Кеңештин конституциялык мыйзамдуулук боюнча комитетинин жыйынында.
Анын айтымында, Коргоо министрлигинин Билим берүү министрлиги менен биргелешкен айрым долбоорлору бар.
«Биз аскерге чакырыла турган жаштарды тарбиялоо армиядан эмес, бала бакчадан, үйдөн башталышы керек деп эсептейбиз. Ошондо гана бул терс көрүнүштөрдүн тамырын кырка алабыз», – деди ал.
Мукамбетов бул максатта иштелип чыккан долбоорлор бар экенин, бирок каржылоо маселеси чечиле электигин билдирди.
«Мектептерде аскерге чейинки даярдык бар. Ал баарына бирдей. Биз ардактуу эс алууга чыккан, профессионалдуу даярдыгы бар кадрлар бул даярдык менен алектенишин каалайбыз», – деп маалымдады ал.
Ал бул багытта иштер жүрүп жатканын белгилеп, армиядагы жоокерлер арасындагы зомбулукту жоюуга үмүттөнөрүн билдирди.
«Ал эми армияда жоокерлерди адаптациялоо боюнча программа бар. Ал мектептерде 9-класстан башталат. Аскерге чакырылуучулар каттоодон өтүшөт. Ушул учурдан баштап биз жаш муунду изилдейбиз. Аскер бөлүктөрүнүн өкүлдөрү маектешүүгө келишет. Эгер мурда жаш жоокердин курсу бир айга созулса, азыр жаңы шарттарга көнүшү үчүн 2 айга созулат. Дээрлик бардык аскер бөлүктөрүндө бизде психологдор бар. Аскерге чакырылуучулар тереңдетилген медициналык кароодон өтүшөт. Жумуш абдан көп. Бул маселе көзөмөлдө», – деп билдирди Мукамбетов.
Сүрөт: akipress.org сайтынан алынды