Бул тууралуу EurasiaPluse маалымат агенттиги билдирди.
Turmush — Жети-Өгүз районуна караштуу Аң-Өстөн айылынын тургуну Бурул Уркунчиева бир учурда 3 жумушту аркалап келет. Аны менен Turmush басылмасынын аймактык кабарчысы маек куруп келди.
Бурул Уркунчиеванын айтымында, аракет жана эмгек ийгиликке алып келет.
«Мен 1983-жылы Жети-Өгүз районуна караштуу Саруу айылында жарыкка келгем. 2000-жылы мектепти аяктаган соң Касым Тыныстанов атындагы Ысык-Көл мамлекеттик университетинин тарых факультетине тапшырдым. Окуу жайды аяктаган соң Аң-Өстөн айылына келин болуп келип калдым. Жолдошум Теңдикбек Байсеитов Ички иштер кызматында иштеп, азыр эс алууда. Биздин 2 уул, 2 кызыбыз бар.
Эмгек жолумду мектепте мугалим болуп иштөө менен баштагам. Анан эле айылга бала бакча ачылып калып, 2017-жылдан бери тарбиячы болуп эмгектенип келем. Бала бакчадан бөбөктөргө тарбия берип, иштен келген соң уй саап, үй жумуштары менен алек болом. Андан кол бошой калса, тикмечилик менен алекмин. Бакчадагы бөбөктөргө каармандардын кийимдерин, ар кыл майрамдык иш-чараларга кийим-кечектерди, бакча ичин жасалгалоого өзүм образ жаратып тигип келем. Аял кишинин жумушу кыйла оор, бирок аракет кылуу менен жетишсе болот деп ойлойм. Мен өз ишимди жактырам, балдарга изденүүчүлүк, ойлоп табуу жөндөмдүүлүгүн арттырууга үндөп келем. Анан ар бир майрамда сөзсүз бакчадагы бөбөктөргө улуттук кыргыз кийимин, тебетей, элечек, кыргыз көйнөк, бешмант жана башка түркүн кийимдерди тигип берем. Анан алардын мааниси улуттук каада-салт боюнча да, тарбиялык мааниде да сабактарды өтүп келем», – дейт Бурул айым.
Каарманыбыз жолдошу экөө мал чарбачылыгы менен да алектенишет.
«Жолдошум менен кеңешип мал чарбачылыгына басым жасап, асыл тукум уй баласын багууга аракет кылдык. Ал үчүн атайын окуулардан окуп, тажрыйба топтоп келдим. Айылда деле жакшы жашоого шарт түзүп алса болот экен. Азыр жолдошум экөөбүз асыл тукум мал багууга тыным албаган аракет көрүп, анын акыбети кайтып жатат. Уй саап, сүт өткөрүп, эт багытындагысын бордоп (семиртип) жолдошум сатып келет. Ошентип чакан чарбабызды түптөп алдык. Айылда көп деле нерсе сатып албайбыз, экологиялык таза азыктар менен тамактанууга аракет кылабыз. Азыр жолдошум сандан сапатка өтүп чарбасын кеңейтүүнү максат кылып жатат. Асыл тукум уй баласы сүт, эт берип, кирешелүү болот экен.
Ошентип бала бакча, чарбачылык, тикмекчилик кесибин аркалап жатам», – дейт.
Айыл тургундары элеттик келин Бурул айылда «активдүү, супер келинчек» деп таанышат. Анткени айылдагы иш-чараларга такай катышып, байгелүү орундарга ээ болуп келет.
Сүрөт: akipress.org сайтынан алынды