Бул тууралуу EurasiaPluse маалымат агенттиги билдирди.
Turmush — Ысык-Ата районунун Кочкорбаев айыл аймагындагы Будёновка жалпы билим берүү орто мектебине «Эл агартуунун отличниги» Адиков Үсөйүн Райымкуловичдин ысымы ыйгарылып, анын негизинде негизделген мектептин 50 жылдык мааракеси белгиленди. Бул тууралуу райондук мамлекеттик администрациясынан билдиришти.
Иш-чарага райондук мамлекеттик администрациясынын башчысынын орун басары Алмаз Сүйүндуков, Кочкорбаев айыл өкмөтүнүн башчысы Азамат Кожомамбетов, айыл аймактын аксакалдары, айылдык кеңештин депутаттары, Үсөйүн Адиковдун окуучулары, балдары жана жакындары катышты.
Үсөйүн Адиков 1929-жылы 10-майда Кеңеш айылында туулган. Балалыгы Улуу Ата Мекендик согуштун оор мезгилине туш келгени менен, ал билим алууга да, колхоздун иштерин күжүрмөндүк менен аткарууга да жетишкен.
1948-жылы Кыргыз мамлекеттик университетинин тарых факультетине окууга тапшырып, 1953-жылы жогорку окуу жайды ийгиликтүү аяктаган. Эмгек жолун Кара-Кулжа районундагы ошол мезгилдеги жалгыз мектептен баштап, 1956-жылы ошол мектептин директору болуп дайындалган. Турмуш шарттарына байланыштуу туулган жерине кайтып келип, 1959-жылы Буденовка айылындагы жети жылдык, 4 класстык бөлмөсү бар мектепке директор болуп эмгектенген.
Окуучулардын саны өсүп, кичинекей мектепке сыйбай калганда, Үсөйүн Адиков бул маселени Коммунисттик партиянын Борбордук комитетине чейин жеткирип, кайрылуу жолдогон. Натыйжада 1974-жылы жаңы мектептин курулушу башталып, 1975-жылдын 23-февралында пайдаланууга берилген. Үсөйүн Райымкулович Буденовка мектебинде 1959-1998-жылдары үзүрлүү эмгектенген. Учурда аталган мектепти Кайдулатова Миргүл Бейшенбековна жетектеп келет.
Сүрөт: akipress.org сайтынан алынды