Бул тууралуу EurasiaPluse маалымат агенттиги билдирди.
Turmush — Чүй районундагы Кошой айылы менен Токмок шаарынын ортосундагы жолдо унаа кырсыгы катталды. Бул туралуу окуянын күбөлөрү билдиришти.
Маалыматка караганда, «BMW» жана «Renault» үлгүсүндөгү унаалар бет маңдай сүзүшкөн.
Окуя бүгүн, 6-май күнү саат 10:00 чамасында болгон.
Кырсыктын кесепетинен 1 адам каза таап, 2 адам жабыркады.
Жеринде милиция кызматкерлери жана куткаруучулар иш алып барышууда.
Чүй ОИИББ боюнча ЖКККБнын басма сөз кызматы билдиргендей, «Renault» үлгүсүндөгү унаасынын айдоочусу — 1956-жылы туулган А.Т.А. жеринде каза тапкан. Ал эми «BMW» үлгүсүндөгү унаанын айдоочусу жана жүргүнчүсү жаракат алып, Чүй районун аймактык ооруканасына жаткырылган.
Кийинчерээк Чүй райондук дарыгерлердин жалпы практикалоо борборунан билдиришкендей, аталган жол кырсыгынан улам саат 09:20 чамасыгнда 2003-жылы туулган Д.Б.М. оорукананын хирургия бөлүмүнө келип түшкөн.
Алдын ала маалыматтар боюнча, Д.Б.М. баш мээсинен жабыркаган, мээси чайкалып, бети сыйрылган. Алкоголдук мас абалында болгон. Учурда абалы туруктуу.
Саат 09:30 чамасында экинчи бейтап — 2001-жылы туулган И.А.Э. хирургия бөлүмүнө түшкөн. Анын баш мээси чайкалып, бети көгөрүп сыйрылган. Сол далысы чыгып кеткен. Алкоголдук мас абалында болгон. Учурда абалы туруктуу.
Д.Б.М. ооруканага өзү келсе, И.А.Э.ни тез жардам кызматынын унаасы алып келген.
Сүрөт: akipress.org сайтынан алынды