Бул тууралуу EurasiaPluse маалымат агенттиги билдирди.
Turmush — Түп районуна караштуу Сары-Тологой айылынын тургуну Махабат Амантурова ат чаап, кыз куумайга катышып келет. Аны менен аймактык кабарчы маек курду.
Ал ашпозчулук менен массаж жасоо кесибин Кант шаарындагы №25 кесиптик-техникалык лицейинде окуган.
«Жайкысын жайлоодо, кышкысын Бишкекте болом. Ат чабуу өзүмдүн дээримде бар болчу, 2-3 жашымда атамдын таякеси атка өңөрүп, кээде атты мингенге берип коюп жүрүп, ошондон кызыгуум аябай күчөгөн. Ата-энем колдоп, ат мингениме каршы болушкан жок. Мен кайда барам десем жиберишет.
2018-жылы биринчи жолу кыз куумайга түшүп биринчиликти алгам. Ошондон бери кыз куумай, кыз жарыштарда катышып жүрөм. 2023-жылы Түгөлбөй Сыдыкбековдун 90 жылдыгына карата Каркыра жайлоосунда жармаңке өткөн. Ошондо биринчиликти алып, кир жууган автомат машина утуп алгам.
Ат чапканыма байланыштуу атамдын инилери, кошуна абаларым “эркек бала болуп калсаң, абам менен жеңемди жыргатмаксың” деп айтышат. Кээде ат ала качып кетип араң токтоткон күндөр болгон. Элдер менин ат чапканымды көрүп аябай таң калышат. Кээ бири “эркектерге караганда кыйын минет экенсиң” деп айтышат.
Азыркы учурда массаж жасап иштеп жатам. Күзүндө дагы башка окууларга окусам деген ойлорум бар. Быйыл бир кыз экөөбүз улакчы кыздар командасын түзүп чыктык. Бош убактымды ата-энем менен өткөрөм. Алар менен сүйлөшүп, ат бастырып келем.
Үй-бүлөдө 5 бир тууганмын. Менден уулу 2 эжем, 1 агам, иним бар.
Келечекте Кыргызстанга салымымды кошуп, Кыргызстанды дүйнөгө таанытсам деген кыялым бар», – деди ал.
Учурда ал 23 жашта.
——————————
Ысык-Көл облусунун Түп районундагы Сан-Таш айыл өкмөтүнө караштуу Сары-Тологой айылы 1901-жылы (айрым маалыматтарда 1916-1930-жылдары) кыштак болуп негизделип, эл отурукташа баштаган.
Бийик тоолуу катаал шартка кирген бул айыл Ысык-Көлдүн түндүк-чыгышында орун алган. Түп районунун борборунан 40 чакырым жана Каркыра жайлоосундагы Казакстандын чек арасынан 50 километр алыстыкта жайгашкан.
Сүрөт: akipress.org сайтынан алынды