Бул тууралуу EurasiaPluse маалымат агенттиги билдирди.
Turmush — Кадамжай районунун Орозбеков айыл аймагынын аймагында Элпесеки айылынын аталышы салмак бирдигин түшүндүрөт. Бул тууралуу Turmush басылмасынын аймактык кабарчысына жергиликтүү тургун Жумагул Жалилов билдирди.
Анын айтымында, айыл Өзбекстандын Шахмардан анклавына чектеш жайгашкан. Элеттин аталышы «250 грамм» дегенди түшүндүрөт.
«Биздин айылда негизи найман уруусунун өкүлдөрү жашайт. Айылдын аталышы өзүнчө бир кызык тарых. Биз дагы ата-бабалардан укканыбызды айтабыз. Айылдагы дарыянын жээгинде бир топ чоңдуктагы 5 таш бар. Ал таштарды «пайгамбардын чакмак ташы» деп коюшат. Мухаммед пайгамбардын күйөө баласы Али баатыр ошол 5 ташты кармап туруп, «бул 250 грамм экен» деп таштап койгону айтылат. Андыктан элпесеки деген сөз, «элпейса» дегенди түшүндүргөн. «Элпейса» сөзү «250 грамм» дегенди түшүндүргөн. Ал учурда салмак бирдиги килограмм, грамм деп өлчөнбөгөн. Салмак бирдик «пайса» жана башка сөздөр менен айтылган. Элпейса сөзү фарс тилинен болсо керек.
Бул айылда негизинен кара найман уруусунун өкүлдөрү жашайт. Ал эми биздин ата-бабаларыбыз хан болуп, хан Бутукенин ордосу азыркы Өзбекстандын Вадул аймагында болгон. 1960-жылдарга чейин ордосу сакталып турган», – деди ал.
Элпесеки айлына жанаша Ак-Кыя айылы жайгашкан. Андыктан Элпесекинин тургундарынын документтерине да Ак-Кыя айылы деп жазылып келет.
Аталган айылдарда жалпысынан 250гө жакын кожолук жашайт.
Сүрөт: akipress.org сайтынан алынды