Бул тууралуу EurasiaPluse маалымат агенттиги билдирди.
Turmush — «Мекендештер» рубрикасынын кезектеги каарманы — 22 жаштагы Анара Төлөкөва. Ал учурда Италия мамлекетинин Кассино шаарында жашайт. Аны менен аймактык кабарчы маектешти.
Анара Төлөкөва 2003-жылы Нарын облусунун Кочкор айылында төрөлүп, 2 жашында Токмокко көчүп келген. Токмок шаарындагы №7 орто мектебин бүтүргөн.
«Азыр Кассино шаарында жашайм. Италияда экономика багытында бакалавриатта (Cassino University) окуп жатканыма эки жыл болду. Учурда студенттер алмашуу (Erasmus) программасы аркылуу 2 айга Стамбул шаарындамын, жакында кайра Италияга кетем
Чет өлкөдө билим алуу бала кезимден бери эң чоң кыялдарымдын бири болчу. 11-классты бүтүргөндөн кийин Италияга тапшырууну туура көрдүм. Себеби ал жакта жогорку билим 12-класстан башталат. Ошондуктан, БГУда социология багытында 1 жыл окуп, ошол этапты 12-класс катары көрсөтүп документ тапшыргам.
Негизи башка өлкөлөрдүн маданиятын үйрөнүүгө кызыгып келем. Италияны тандаганыма да ушул себеп болгон. Бул жактагы эл кыргыз элине көп жагынан окшош. Мисалы, той-мааракелерди жакшы көрүшөт жана көбүнчө кечигип барышат. Ачык мүнөздүү, жардам берүүгө даяр адамдар. Кыргыздарга болгон мамилелери да жакшы. Өспүрүмдөр “нихау” дешип жаңылышып коюшпаса, калган учурда эч кандай терс көрүнүштөр болбойт.
Экономикалык жактан азыр Италияда кыйынчылыктар айтылганы менен, жашоо Кыргызстанга салыштырмалуу кыйла жеңил. Жай айларында, каникул маалында иштеп калам. Ал жердеги эмгек акы Бишкектеги айлык маянага салыштырмалуу бир топ жакшы, көп нерсеге жетет.
Мага кызык көрүнгөн жагдайлардын бири — бул жактагы 30-40 жаштагы адамдар өздөрүн 20-25 жаштагыдай эркин алып жүрүшөт. Кээде шаар алмаштырып, жаңы жерден жумуш табуу үчүн бат эле көчүп кете алышат. Алар мени “кичинекей азиялык кыз, жүрөгү тоодой” деп айтышат. Бул сөздөрдү башка кыргыз тааныштарым да көп угушкан.
Маданият жагынан алганда, бул жакта адамдар бири-биринин жашоосуна кийлигишпейт. Ар ким өз жашоосу менен алек. Бул мага жакты. Мындан сырткары, бул жакта адамдар кеч жетилет жана кеч карышат десем болот. Бактылуу болуу үчүн жакшы тамак менен бир стакан “Апероль” жетиштүү. Биздей болуп ар нерсеге убара болуп, өзүн кыйнай беришпейт. Бул жактагы эл да мээнеткеч экен.
Эсимде, бир жолу бир италиялык кыз менен таанышып, жаңы жылды анын үй-бүлөсү менен шаар четиндеги үйүндө тосуп калдым. Жанымда эки курбум бар эле – абдан өзгөчө тажрыйба болду.
Шенген визасы бар болсо, болгону 10 000 сомго Парижге барып келсе болот экен. Кээде учак билети автобус билетинен да арзан болуп калат. Италия мага саякат тууралуу көз карашымды түп-тамырынан өзгөрттү.
Мен жашаган шаарда көптөгөн кыргыз жана казак студенттер жашайт.
Менин эгизим бар, аты Жанара. Ал Кыргыз мамлекеттик медициналык академиясында (КГМА) окуйт. Экөөбүз бала кезден тарта жашоого болгон көз карашыбыз менен айырмаланып келгенбиз. Ошондуктан ал медицина тармагын, мен экономика багытын тандадым.
Үй-бүлөдө 4 бир тууганбыз. Улуубуз Самара, андан кийинкиси Самат. Экөө тең үй-бүлөлүү. Атамдын аты Төлөк, апамдын аты Нургүл. Келечектеги максатым — окуумду ийгиликтүү аяктап, жакшы жумушка орношуу жана кийин Кыргызстанга кайтып келүү», – деди ал.
Сүрөт: akipress.org сайтынан алынды