Бул тууралуу EurasiaPluse маалымат агенттиги билдирди.
АКИpress – Кыргызстандын делегациясы Европалык комиссиянын алдында өлкөнүн авиация тармагын реформалоо боюнча 2 жылдык иштин жыйынтыгын ийгиликтүү коргоду, деп маалымдады Жарандык авиация мамлекеттик агенттигинин басма сөз кызматы.
Бул аракеттер Европа Биримдигинин коопсуздук тизмесинен (кара тизмеден) чыгуу процессинин алкагында жүргүзүлдү. Жолугушуу Европа Биримдигинин Мобилдүүлүк жана транспорт боюнча башкы директоратында («DG MOVE») өтүп, анда Кыргызстандын учуулардын коопсуздугун камсыздоо, көзөмөл жана эл аралык стандарттарга шайкештик тармагындагы негизги жетишкендиктери талкууланды. Директораттын өкүлдөрү аткарылган иштерге оң баа беришкени кабарланды.
Европа комиссиясына сунушталган негизги жетишкендиктер:
– Учуу коопсуздугун жогорулатуу жана мурда аныкталган бузууларды жоюу боюнча иш-чаралар планы толук аткарылды;
– көзөмөл процедуралары жаңыланып, инспекторлордун квалификациясы жогорулады жана агенттиктин материалдык-техникалык базасы бекемделди;
– нормативдик-укуктук база модернизацияланып, авиакомпаниялар менен аба кемелерин сертификаттоо тармагында европалык стандарттар менен шайкештикке жетишилди;
– институционалдык потенциал жогорулады: каржылоо көбөйтүлүп, инспекторлордун эмгек шарттары жакшыртылды жана кадрлар системалуу окутулууда.
Жолугушуунун жүрүшүндө Кыргызстандан барган делегация Европа комиссиясына техникалык отчетторду, мыйзамдык актыларды жана өлкөнүн Европа Биримдиги менен түз аба каттамдарын калыбына келтирүүгө даяр экендигин тастыктаган бардык тиешелүү документтерди тапшырды.
Европа Биримдигинин комитетинин жыйынтыгы боюнча, ушул жылдын май айына пландалган жыйындын негизинде бул жолугушууга байланыштуу расмий баа жарыяланат.
Сүрөт: akipress.org сайтынан алынды