Бул тууралуу EurasiaPluse маалымат агенттиги билдирди.
Turmush — Бүгүн, 26-май күнү Жайыл районунун жана Кара-Балта шаарынын мектептеринде акыркы коңгуроо жаңырды, деп билдирет аймактык кабарчы.
Маалыматка караганда, 2024–2025-окуу жылынын аягында район боюнча жалпы орто билим берүү мекемелеринде 27 миң 895 окуучу билим алууда. Жайыл районунун айылдарында быйыл 11-классты 478 окуучу бүтүрүп жатса, Кара-Балта шаарында 1344 бүтүрүүчү мектепти аяктоодо.
Ошондой эле, 11-класстын бүтүрүүчүлөрү жалпы республикалык тестирлөөгө катышты. ЖРТ 17–20-май күндөрү Кара-Балта шаарындагы №1 жана №12 орто мектептеринин базасында өткөрүлдү. Ага 977 окуучу, анын ичинде өткөн окуу жылынын бүтүрүүчүлөрүн камтыган кошумча тизмедеги абитуриенттер катышты. ЖРТнын жыйынтыктары 20-июнга жакын белгилүү болот.
«Билим берүүнүн сапатынын негизги көрсөткүчү — бул олимпиадалардагы жыйынтыктар. Быйылкы окуу жылындагы бул сынактардын жыйынтыгында бизде 9 байгелүү орун бар. Жайыл райондук билим берүү бөлүмү Чүй облусунда 1-орунду ээлесе, Чүй облусу республика боюнча 2-орунду ээледи.
Мен төмөнкү окуучуларды өзгөчө белгилеп кетким келет: №10 орто мектептин 11-классынын окуучусу Айдана Искакбекова орус тили жана адабияты боюнча облустук олимпиадада 2-орунду ээледи, №6 орто мектептин 10-классынын окуучусу Аруке Слайманова математика боюнча облустук олимпиадада 2-орунду ээледи, №6 орто мектептин 11-классынын окуучусу Мадина Шукурова орус тили жана адабияты боюнча олимпиадада байгелүү орунга ээ болду, №4 орто мектебинин 11-классынын окуучусу Эдиль Абасов орус тили жана адабияты боюнча 1-орунду ээледи.
Ушул жылдын апрель айында Ставрополовка айылынын орто мектеби, Бекитай айылынын орто мектеби жана Кара-Балта шаарындагы №9 орто мектеп сыяктуу бир катар мектептер PISA эл аралык билим берүү жетишкендиктерин баалоо программасына катышышты. Натыйжаларын күтүп жатабыз», – дейт райондук билим берүү бөлүмүнүн башчысы Талантбек Арыков.
Сүрөт: akipress.org сайтынан алынды