Бул тууралуу EurasiaPluse маалымат агенттиги билдирди.
Turmush — Ош шаарынын Ленин көчөсүндөгү эски имарат жатакана катары кайра курулууда. Бул тууралуу Ош шаардык капиталдык курулуш башкармалыгынан билдирди.
Маалым болгондой, бул долбоор Ош шаарынын мэри Жеңишбек Токторбаевдин жеке чечими менен турмуштук кыйынчылыктарга дуушар болгон, жалгыз бой жана көп балалуу үй-бүлөлөр үчүн ишке ашырылууда. 3 кабаттан турган жатакананын ар бир кабатында ашкана, эс алуучу бөлмө, жуунучу жай, ажаткана, муздаткыч сыяктуу тиричилик техникасы менен камсыздалган бөлмөлөр каралган. Анын короосу тосмо менен курчалып, балдар аянтчасы, унаа токтотуучу жай, жашыл бак жана очоккана курулууда.
Долбоор 2025-жылдын март айында тендерге коюлуп, апрель айынын аягында жеңүүчү мекеме менен келишим түзүлгөн. Учурда имараттын эшик-терезелери толугу менен алмаштырылып, шыптары кагылып, сырты жылууланды. Чатыры да жаңыланып, жалпы иштердин 70% аткарылды.
Календардык графикке ылайык, объект июль айында пайдаланууга берилет. Оңдоп-түзөө иштерине жергиликтүү бюджеттен 34 миллион сом бөлүнгөн. Курулуш иштерин Ош шаардык мэриясынын капиталдык курулуш башкармалыгы көзөмөлдөп жатат.
Сүрөт: akipress.org сайтынан алынды