Бул тууралуу EurasiaPluse маалымат агенттиги билдирди.
Turmush — Ош шаарынын казысы Мирланбек Токтомушев тергөө иштерине байланыштуу УКМКга жеткирилди.
Айрым булактардын маалыматына караганда, Улуттук коопсуздук боюнча мамлекеттик комитеттин Ош шаары жана Ош облусу боюнча башкармалыгынын кызматкерлери Мирланбек Токтомушевди мекемеге алып барышкан.
Алдын ала маалыматтарга ылайык, тергөө иш-чаралары ажылык уюштуруудагы каржылык мыйзам бузуулар боюнча жүрүүдө. Токтомушев бул иште кандай макамда өтүп жатканы азырынча белгисиз. Ошондой эле, ал кармалганбы же кармалган жокпу бул тууралуу да так маалымат жок.
Turmush басылмасы УКМКнын басма сөз кызматына расмий түшүндүрмө алуу үчүн кайрылган.
Ош шаарындагы мусулмандардын казыятынын жетекчиси болуп Токтомушев Мирланбек Бакишович дайындалган. Аны дайындоо тууралуу буйрукка муфтий Замир Ракиев кол койгон.
Буга чейин Ош шаардык мэриясы билдиргендей, 21-майда ажылыкка бара жаткан зыяратчылардын алгачкы тобу Ош шаарындагы аэропорт аркылуу учуп кетишкен.
Ажылыкка жөнөп жаткан зыяратчыларды узаткандардын катарында Ош шаарынын казысы Мирланбек Токтомушев да болгон. Андан тышкары, Ош шаарынын мэри Жеңишбек Токторбаев, Кыргызстан мусулмандар дин башкармалыгынын өкүлдөрү, башында муфтий Абдулазиз кары Закиров, президентке караштуу Дин иштери жана этностор аралык мамилелер боюнча мамлекеттик агенттиктин түштүк региону боюнча жетекчиси Фурхатбек Адилбек уулу жана башка диний ишмерлер да катышкан.
Быйыл Сауд Аравиясы Кыргызстанга ажылык сапар үчүн 6060 квота бөлгөн. Зыяратчыларды жалпысынан 139 топ башчы коштоп жүрүшү күтүлүүдө.
Аэропорт в городе Ош / 21 мая 2025
Сүрөт: akipress.org сайтынан алынды