Бул тууралуу EurasiaPluse маалымат агенттиги билдирди.
Turmush — Ош шаарынын Алай көчөсүндө 5 күн мурун — 1-майда жаңы тротуар пайдаланууга берилген. Ачылыш аземге Ош шаарынын мэри Жеңишбек Токторбаев келген.
Социалдык тармактарда тротуар менен жолдун үстүнкү бөлүгү курулуш компаниясынын оор техникалары менен кантип талкаланганын көрсөткөн видео пайда болду.
«Ош шаардык жолдор» муниципалдык ишканасынын башчысы Жеңиш Шоноевдин айтымында, айдоочулар уруксаты жок оор жүк ташуучу унаалары менен кирип, жолду жараксыз абалга келтирген.
«Алай көчөсүнүн жолун былтыр асфальттап, иштетүүгө бергенбиз. Ал көчөгө оор жүк ташуучу унааларга кирүүгө болбойт. Алай көчөсүндө жайгашкан көп кабаттуу үйдүн курулушу жүрүп жаткандыктан бетон ташыган оор жүк ташуучу унаалар жолду жана тротуарды талкалашууда. Бизден уруксат албай, Ош ШИИБи боюнча милициянын кайгул кызматынан уруксаты менен кирип жатышыптыр. Протокол түзүлүп, анын негизинде 470 миң сом айып пул салынган. Жолдон сырткары, жакында гана иштетүүгө берилген тротуарды да бузуп жараксыз абалга келтиришкен. Ал боюнча да өзүнчө протокол түзүлүп, айып пул салынат», – деди Ж.Шоноев.
Аталган көчөдө жайгашкан турак жайдын курулушун «СК Гарант KG» ЖЧКсы жүргүзүүдө. Юстиция министрлигинин маалымат базасында директор жана уюштуруучу катары Сыдыков Уланбек Маматысаевич көрсөтүлгөн. Компания 2018-жылдын 22-июнунда катталып, 2023-жылдын 31-июлунда кайра каттоодон өткөн.
Негизги ишмердүүлүгү — турак-жай жана турак эмес имараттарды куруу.
Буга чейин Ош шаардык муниципалитети И.Раззаков, Алай жана Сүйүнбаев көчөлөрүндөгү жаңы тротуарлардын ачылыш аземи мэриянын жетекчилиги жана жергиликтүү тургундардын катышуусунда болгонун билдирген.
Бул көчөлөрдө жөө жүрүүчүлөр үчүн шарттар жок болуп, шаар тургундарына ыңгайсыздык жараткан. Тротуарлар менен катар ирригациялык системалар орнотулуп, түнкү жарыктандыруу уюштурулуп, кыймылдын ыңгайлуулугу жана коопсуздугу жогорулаган.
Жаңы тротуарлардын жалпы узундугу 3 чакырым 250 метрди түзөт:
– И.Раззаков көчөсүндөгү тротуардын узундугу 2 чакырым, туурасы 3 метр;
– Алай көчөсүндөгү тротуардын узундугу 250 метр, туурасы 2 метр;
– Сүйүнбаев көчөсүнө ар биринин узундугу 500 метр, туурасы 2 метр болгон эки тараптуу тротуарлар курулду.
Сүрөт: akipress.org сайтынан алынды