Бул тууралуу EurasiaPluse маалымат агенттиги билдирди.
Turmush — Сузакта мас абалындагы тургун унаасы менен жол четиндеги 3 жөө жүргүнчүнү сүзүп кетти. Бул тууралуу күбөлөр билдирди.
Алардын айтымында, окуя кечээ, 4-май күнү райондун Таран-Базар айылында орун алган.
«Калма-Кырчын айылынын тургуну Р.М өзүнө тиешелүү болгон “ВАЗ-2107” үлгүсүндөгү унаасын башкарып бара жатып кечке жуук жол четиндеги тротуарда бара жаткан жүргүнчүлөрдү коюп кетиптир. Биз барсак айдоочу мас абалда экен. Кыздардын бири ошол жерде жан берди, ал эми экөөсүн оор абалда бейтапканага алып кетишкен», – дейт күбө.
Аталган маалыматты облустук милиция да ырастап, шектүү камакка алынганын билдирди.
2025-жылдын 4-май күнү саат 19:50 чамасында Сузак районунун Жалал-Абад—Казарман автожолунун 44-чакырымында жол кырсыгы катталды. Бул тууралуу Сузак райондук ички иштер бөлүмүнө Октябрь аймактык ооруканасынан кабарлашкан.
«”ВАЗ-2107″ үлгүсүндөгү автоунаанын айдоочусу — Калма-Кырчын айылынын 1978-жылы туулган тургуну Р.М. автоунааны мас абалда айдап бараткан учурда, жол жээгиндеги тротуарда бара жаткан Таран-Базар айылынын жашоочулары — 2019-жылы туулган М.А. жана 2010-жылы туулган М.А. аттуу балдарды сүзүп кеткен.
Кырсыктын кесепетинен 2019-жылы туулган бала ооруканага жетпей каза болуп калган. Экинчи жабырлануучу — 2010-жылы туулган бала учурда Жалал-Абад облустук ооруканасынын жандандыруу бөлүмүндө жатат.
Бул факт Сузак РИИБдин тергөө кызматы тарабынан Кылмыш-жаза кодексинин 312-беренеси (Автотранспорт каражаттарынын кыймылынын жана аларды эксплуатациялоонун коопсуздук эрежелерин бузуу) боюнча кылмыштардын бирдиктүү реестрине катталып, кылмыш иши козголду.
Шектүү катары айдоочу Р.М. кармалып, учурда Сузак РИИБдин убактылуу кармоочу жайында. Окуя боюнча тергөө амалдары жүрүп жатат», – деп айтылат маалыматта.
Сүрөт: akipress.org сайтынан алынды