Бул тууралуу EurasiaPluse маалымат агенттиги билдирди.
Turmush — Чоң-Алай районундагы Кара-Мык айылынын 23 жаштагы тургуну Улуш Сайпидинова Түркиянын Эрзурум шаарындагы Ататүрк университетинде магистратурада билим алып жатат. Аймактык кабарчы алыстагы мекендештен кабар алды.
Анын айтымында, грант аркылуу келгендиктен билимди бекер алат.
«Мектепти өз айылымдагы Ленин атындагы орто мектептен аяктадым. 2020-жылы Ош мамлекеттик университетинин Кыргыз филологиясы жана журналистика адистигине тапшырып, 2024-жылы ийгиликтүү бүтүрдүм.
Учурда Түркиянын Эрзурум шаарындагы Ататүрк университетинде магистратурада журналистика боюнча билим алып жатам. Бул жылы түрк тилин үйрөнүү курсунда окуп жатам. Ал эми келерки жылдан тарта магистрдик билимимди баштайм. Мен Түркияга «Türkiye Bursları» программасынын негизинде грант аркылуу келгем. Бул грант окуу акысын, жатакананы жана тамак-ашты камсыздап берет», – деди ал.
Каарманыбыз Түркия менен Кыргызстандын жашоосунун айырмачылыктары жана окшоштуктарына да токтолду.
«Кыргызстан менен Түркиянын билим берүү системасында айырмачылыктар бар, бирок экөө тең билимге чоң маани беришет. Маданияты, айрым каада-салттары жана тили да окшошуп кетет.
Башында чет элдик студенттер менен тил маселесинен улам түшүнүшүү кыйын болду. Бирок мимика, кол жаңсоо аркылуу түшүндүрүп, тил табышып кеттик. Бул учурлар мен үчүн абдан кызыктуу жана эсте калаарлык болду.
Келечекте магистратураны ийгиликтүү аяктап, Кыргызстанга кайтып, жергиликтүү университеттердин биринде мугалим болуп иштегим келет. Түркияда алган билимимди кыргыз жаштары менен бөлүшүү — менин чоң максатым.
Түркияда билим алууну каалаган жаштарга кеңешим — коркпогула, аракет кылгыла. Биринчи кезекте максатыңарды так аныктап, студенттик жашооңорду активдүү өткөргүлө. Түрдүү тренингдерге, окууларга катышып, дипломдорду, сертификаттарды топтогула. Бул документтер чет өлкөгө тапшырууда чоң жардам берет. Тил үйрөнүүгө өзгөчө көңүл бурууну сунуштайм. Тил билүү башка өлкөгө чыкканда абдан маанилүү», – деди ал.
Сүрөт: akipress.org сайтынан алынды