Бул тууралуу EurasiaPluse маалымат агенттиги билдирди.
Turmush — Ысык-Көл облусунун Тоң районунун Кызыл-Туу айылынын 35 жаштагы тургуну Урмат Бадачы уулу 30 миң долларга чейин бааланган боз үйлөрдү жасайт. Уста менен Turmush басылмасынын кабарчысы маектешти.
Анын айтымында, жыгачтан жана темирден боз үйлөрдү жасайт.
«Бишкек автомобиль-жол колледжинде бухгалтердик кесип боюнча билим алгам. Устачылык менен алектенгениме 5-10 жылдын жүзү болуп калды. Кошуна Бейшеке Бектенов атадан көрүп, үйрөнгөм. Учурда боз үй жана учурдун талабы болгон этно эмеректерди жасайбыз. Буюртма абдан жакшы. Жада калса жакынкы жана алыскы өлкөлөргө чейин буюртма беришет. Буюртманы бүтүрүп берүү татаалдыгына жараша болот. Хан боз үйдү 4-5 айга чейин жасайбыз. Бирок жөнөкөй боз үйлөрдү 1-1,5 ай ичинде кардарга колуна тапшырабыз. Хан боз үй болушунча топтом болуп, ичинде шырдак, стол, сандык, төшөк, жаа жана күмүш менен жасалган ат жабдыктары менен болот», – деди ал.
Уста эмне себептен темир боз үй жасап калганын түшүндүрдү.
«Бир жылдан бери темир боз үй жасайбыз. Темир боз үй жасап калганыбыздын себеби суроо-талап көп болду. Жайлоодогу чабандар жана соода тармагындагылар темир боз үй сурайт. Темирден жасалган боз үй кыйла арзан. Жыгачтан жасалган боз үй кол эмгекти көбүрөөк талап кылат. Баасы 150 миң сомдон 30 миң долларга чейин барат. Ал эми этно фонду көбүнчө түз эфирде улуттук кийим-кече, сүрөт тарткандар жана сахнага фон кылгандар алат», – деди ал.
Урмат Бадачы уулу үй-бүлөлүү, 2 баланын — 1 уул жана 1 кыздын атасы. Учурда жубайы экөө үчүнчү наристесин күтүп жатышат.
Сүрөт: akipress.org сайтынан алынды